Վարդան Ղուկասյանը Ծառուկյանի ասածից «տեղյակ չէ, բայց կողմնակից է»

Ազգային ժողովի «Ծառուկյան» դաշինք խմբակցության պատգամավոր Վարդան Ղուկասյանը Factor.am-ի հետ զրույցում անդրադառնալով վարչապետ Կարեն Կարապետյանի պաշտոնավարման մեկ տարվան՝  հայտարարեց՝ նկատել է, որ Կառավարության ղեկավարը շատ բարյացակամ է Գյումրիի նկատմամբ:

«Տեսնում եմ, որ հատկապես հուշարձանները, որոնք 1700 հուշարձան են բաց երկնքի տակ, ինքը հատիկ-հատիկ նայում է և տեսնում եմ, որ շատ լավ արտահայտվում է: Շուտ-շուտ գալիս է Գյումրի քաղաք, տուրիզմի զարգացման հետ կապված ինչ-որ ծրագրեր իրականացնում, բայց դա շատ քիչ է, իհարկե, ժամանակն էլ շատ քիչ է, սպասենք, տեսնենք՝ ինչ է լինում»,- ասաց Գյումրու նախկին քաղաքապետ Վարդան Ղուկասյանը:

Ինչ վերաբերում է վարչապետ Կարեն Կարապետյանի հետագա պաշտոնավարմանը, Ղուկասյանը դժվարացավ ասել, թե ինչ զարգացումներ են սպասվում 2018 թվականին, միայն վստահ շեշտեց. ««Ծառուկյան» դաշինքում նման քննարկում չի եղել, երբ քննարկում լինի, բոլորը հավանական է կասեն իրենց կարծիքը, ես էլ իմ կարծիքը կասեմ: Եվ վերջապես «Ծառուկյան» դաշինքը միասին է, ինչ որոշում կայացրեց, ոչ մեկ իրավունք չունի այլ բան ասելու, այդ ժամանակ բոլորս միասին մեր խոսքը կասենք»:

Վարդան Ղուկասյանը թեև տեղյակ չէ, թե Գագիկ Ծառուկյանը ՀՀԿ-հետ կոալիցիա կազմելու հարցով ինչ է հայտարարել, բայց նշեց. «Ինչ-որ ասել է, մենք կողմնակից ենք Գագիկ Ծառուկյանի ասածին, անպայման կպաշտպանենք իրա ասած խոսքերը»:

Մանրամասները ՝ տեսանյութում:

Շողիկ Գալստյան