Պետք է ներառված լինեին նաև ձմերուկն ու սեխը. Ավետիք Իշխանյանը՝ դատարան արգելված իրերի ցանկի մասին

Փաստաբանների հավաք-քննարկմանը ներկա է մոտ 25 փաստաբան: Փաստաբան Երվանդ Վարոսյանն իր խոսքում անդրադարձավ վերջին շրջանում փաստաբանների խուզարկությունների դեպքերին՝ նկատելով, թե արդյոք հարկավո՞ր է փաստաբանների զննությունը և երբևէ եղե՞լ է դեպք, երբ փաստաբանը ցանկացել է օժանդակել իրավախախտմանը կամ հանցագործությանը:

Փաստաբան Տիգրան Աթանեսյանն էլ հավելեց, թե արգելված իրերի ցանկը կարելի է համարել «Քոմեդի քլաբի» քննարկման առարկա, քանի որ տպավորություն է, որ փաստաբաններն ամեն օր շյուղ են տանում դատարաններ:

Իրավապաշտպան Ավետիք Իշխանյանն էլ հեգնեց, թե արգելվող իրերի ցանկում պետք է ներառված լինեին նաև ձմերուկն ու սեխը:

Փաստաբան Նիկոլայ Բաղդասարյանը ևս իր վրդովմունքը հայտնեց փաստաբանների խուզարկության երևույթի դեմ՝ առաջարկելով այս մեկօրյա գործադուլով չբավարարվել և շարունակել բողոքի ակցիաները:

Իսկ փաստաբաններից Գրիշա Բալասանյանն էլ նկատեց, որ դատարան մուտք գործելիս ենթարկվել է զննության, այլ ոչ թե խուզարկության, ուստի բարձրացրեց այն հարցը, որ փաստաբանների նկատմամբ տարբերակված մոտեցում է գործում: Ապա հարց բարձրացրեց, թե ինչու բազմամյա աշխատանքային փորձ ունեցող փաստաբանները նման նվաստացուցիչ խուզարկության ենթարկվեն, իսկ օրինակ ինքը զննվի:

Հավաք-քննարկմանը ներկա է նաև քաղաքացիական ակտիվիստ Վարդգես Գասպարին, փաստաբան Տիգրան Աթանեսյանը ներողություն խնդրեց վերջինիցս՝ հիշեցնելով, որ փաստաբաններից մեկի կողմից վիրավորական գրառում է արվել Գասպարիի հասցեին:

Նշենք, որ հավաք-քննարկումն այս պահին շարունակվում է:

Սեդա Ղուկասյան