«ԵՄ ընդլայնմանը դեմ եմ լինելու, մինչև խորքային բարեփոխումեր չլինեն». Էմանուել Մակրոն

Այսօր Եվրամիության գագաթնաժողովի տապալումը նշան է, որ Միության հետագա ընդլայնումն առանց խորքային բարեփոխումների անհնար է: Այս մասին հայտարարել է Ֆրանսիայի նախագահ Էմանուել Մակրոնը, գրում է Lenta.ru-ն:

Նրա խոսքով՝ եվրակառույցների առանցքային պաշտոններում թեկնածությունների վերաբերյալ քվեարկությունը ձախողվեց ներքին տարաձայնությունների, ինչպես նաև որոշ քաղաքական գործիչների հավակնությունների պատճառով:

«Եվրամիությունն այս իրավիճակից պետք է «անհրաժեշտ եզրահանգումներ անի», քանի որ նման կոնֆլիկտները խաթարում են եվրոպական կառույցների հանդեպ վստահությունը: Մենք Եվրամիության վատ կերպար ենք ստեղծում»,- ընդգծել է Ֆրանսիայի նախագահը:

Ըստ նրա՝ Եվրամիությունը խորը և ինստիտուցիոնալ բարեփոխումների կարիք ունի, առանց որոնց հետագա ընդլայնումն անհնար է:

«Տեղի ունեցող իրադարձությունների ֆոնին ես կասկածամտորեն եմ վերաբերվում ԵՄ-ի ընդլայնմանը: Մենք նույնիսկ հիմա չենք կարողանում համաձայնության գալ, երբ մեր անդամների թիվը 28 է: Այդ իսկ պատճառով ես դեմ եմ արտահայտվելու ցանկացած տեսակի ընդլայնմանը, քանի դեռ Եվրամիության մեխանիզմներում խորը փոփոխություններ չեն եղել»,- հավելել է Մակրոնը:

Նշենք, որ այսօր առավոտյան Եվրոպական խորհրդի նախագահ Դոնալդ Տուսկը դադարեցրել է եվրակառույցների առանցքային պաշտոններում թեկնածությունների վերաբերյալ՝ շուրջ 20 ժամ տևած բանակցությունները: Քննարկումները հետաձգվել են մինչև երեքշաբթի:

Նելլի Մելքոնյան