Փաստաբանների պալատի 184 անդամներ այսօր գործադուլ կիրականացնեն՝ իրենց դժգոհությունը հայտնելով մասնագիտական գործունեության խոչընդոտման դեմ: Վերոնշյալ փասաբաններն այսօր չեն մասնակցելու դատական նիստերին և քննչական գործողություններին՝ այդ կերպ բողոքելով ՔԿՀ-ներում և դատարաններում փաստաբանների խուզարկության դեպքերի դեմ։
«Այս հայտարարությանը միացող փաստաբաններս, ի նշան փաստաբանի մասնագիտության և փաստաբանության անկախության և հեղինակության դեմ իրականացվող գործողություններին մեր անհամաձայնության, 2017թ. սեպտեմբերի 13-ին հայտարարում ենք բողոքի ակցիա (պայմանականորեն՝ գործադուլ), հրաժարվելով մասնակցել այդ օրը նշանակված դատական նիստերին: Նման քայլով մենք նպատակ ունենք արտահայտել մեր բողոքը Հայաստանում փաստաբանության հեղինակության և փաստաբանի մասնագիտության՝ իրավապաշտպանության նկատմամբ վերաբերմունքի այնպիսի անհանդուրժելի դրսևորումների դեմ, ինչպիսին է փաստաբանների և նրանց մասնագիտական ու անձնական տիրույթների և պատկանելիքի անձեռնմխելիության նկատմամբ ոտնձգությունները»,- ասված է դիմում-բողոքին միացած փաստաբանների հայտարարության տեքստում։
Տեղեկացնենք, որ այսօր 11․00-ին Կոնգրես հյուրանոցում փաստաբանների կողմից նախատեսված է հավաք-քննարկում, որին հրավիրված են նաև իրավապաշտպան հասարակական կազմակերպությունների և միջազգային կազմակերպությունների ներկայացուցիչներ։
Սեդա Ղուկասյան
