ԵԽԽՎ-ն կողմ է քվեարկել Ռուսաստանի վերադարձին

ԵԽԽՎ պատգամավորները, գրեթե 9 ժամ տևած քննարկումից հետո, բանաձև են ընդունել, համաձայն որի՝ ռուսական պատվիրակությանը թույլատրվում է նորից մասնակցել Վեհաժողովի աշխատանքներին: Բանաձևին «կողմ» է քվեարկել 118, «դեմ»՝ 62, «ձեռնպահ»՝ 10 պատգամավոր, գրում է ՌԲԿ-ն:

Բանաձևը նախապատրաստվել է «Խորհրդարանական վեհաժողովի որոշումների ընդունման գործընթացը բարելավելու իրավասության և քվեարկության վերաբերյալ» զեկույցի հիման վրա։

Զեկույցով առաջարկվում էր ԵԽԽՎ աշխատանքային կանոններում ավելացնել բանաձև, ըստ որի՝ «ԵԽԽՎ անդամների քվեարկելու, ելույթ ունենալու, ինչպես նաև վեհաժողովում ու նրա մարմիններում ներկայացված լինելու իրավունքները չեն կարող դադարեցվել՝ քննարկումների կամ լիազորությունների վերանայման արդյունքում»։ Բանաձևը ևս մեկ կարևոր որոշում է պարունակել. ԵԽԽՎ-ում այս պահին չներկայացված պատվիրակություններին՝ Ռուսաստանին, Բոսնիա և Հերցեգովինային ապահովել Վեհաժողովի՝ հուլիսին կայանալիք նիստին մասնակցության հայտ ուղարկելու իրավունքով:

Այսպիսով, ռուսական պատվիրակությունն այսօր կկարողանա մասնակցել Վեհաժողովի աշխատանքներին:

Նշենք, որ հունիսի 26-ին ԵԽԽՎ-ն նոր գլխավոր քարտուղար կընտրի, որը լիազորություններն այս տարի աշնանը կստանձնի: Ռուս խորհրդարանականների քվեները ևս հաշվի կառնվեն:

Միաժամանակ, Ուկրաինայի Գերագույն Ռադայի եվրոպական ինտեգրման հարցերով հանձնաժողովի նախագահի պաշտոնակատար Մարիա Իոնովան «Ինտերֆաքսի» հետ զրույցում ասել է, որ ուկրաինական պատվիրակությունն իրեն սկզբունքորեն ռուսների հետ նույն դահլիճում չի տեսնում։

«Ռուսաստանի վերադարձի դեպքում պարզապես կչեղարկենք ամառային նստաշրջանին Ուկրաինայի մասնակցությունը։ Եթե անկեղծ, անգամ չգիտեմ՝ կկարողանա՞նք այնտեղ վերադառնալ, թե՞ ոչ»,- ասել է Իոնովան։

Նելլի Մելքոնյան