18.10.2026 | 18:27
COP17-ի պաշտոնական բացման արարողությունը․ ՈւՂԻՂ
Պեսկովը նշել է ՌԴ-ից Վրաստան ավիափոխադրումների վերականգնման պայմանը
Քաղաքականություն
24.06.2019 | 17:29
Ռուսաստանից Վրաստան ավիափոխադրումների վերականգնումը հնարավոր է միայն այդ երկրում իրադրությունը ոչ ռուսատյաց հուն վերադարձնելուց հետո: Լրագրողների հետ զրույցում այս մասին հայտարարել է ՌԴ նախագահի խոսնակ Դմիտրի Պեսկովը, գրում է ՏԱՍՍ-ը:
«Հրապարակված փաստաթղթերից (հուլիսի 8-ից Ռուսաստանից Վրաստան ավիափոխադրումների ժամանակավոր արգելքի մասին նախագահի հրամանագիրը) երևում է, որ հստակ ժամկետ չի արձանագրվել: Խոսքը պարզապես Վրաստանում իրադրությունը ոչ ռուսատյաց հուն վերադարձնելու մասին է: Երբ դա կարձանագրվի, ընդունված որոշումը վերանայելու առիթ կդառնա»,- ասել է Պեսկովը:
Նրա գնահատմամբ՝ առայժմ իրավիճակը, հակառակը, խորացման միտում ունի, «այնտեղ ներքաղաքական ճգնաժամի որոշակի նշաններ կան»: «Դա մեր գործը չէ, դա Վրաստանի ներքին գործն է: Մեր գործն է, երբ դա հակառուսական բնույթ է ստանում: Դա այն է, ինչ մեզ ստիպում է անհանգստանալ»,- հավելել է Կրեմլի պաշտոնական ներկայացուցիչը:
Պեսկովը հավելել է, որ ոչինչ չգիտի Վրաստանում իրավիճակի հետագա վատթարացման դեպքում լրացուցիչ սահմանափակումների ներդրման ծրագրերի մասին:
Նա, միաժամանակ, չի կարողացել պատասխանել հարցին՝ արդյո՞ք ռուսաստանցի այն զբոսաշրջիկները, որոնց վճարված ուղեգրերը ավիափոխադրումների դադարեցման պատճառով կչեղարկվեն, փոխհատուցում կստանան. «Չեմ կարող պատասխանել այդ հարցին, մանրամասների չեմ տիրապետում»:
