Տեսանյութեր
20.06.2019 | 16:37Այսօր ՀՀ կառավարության նիստում թեժ քննարկվեց ԱԺ «Իմ քայլը» և «Լուսավոր Հայաստան» խմբակցությունների պատգամավորներ Ռուբեն Ռուբինյանի և Արման Բաբաջանյանի հեղինակած նախագիծը «Դիվանագիտական ծառայության մասին» օրենքում փոփոխություն կատարելու մասին:
Նախագծով նվազագույնի է հասցվում ՀՀ դիվանագիտական ներկայացուցիչների պաշտոններում քաղաքական կամ անձնական շահով պայմանավորված նշանակումների հնարավորությունը, ինչն առողջացնում է դիվանագիտական ծառայության ոլորտը՝ ստեղծելով հավասար հնարավորություններ և առողջ մրցակցային մթնոլորտ դիվանագիտական ծառայության ոլորտում համապատասխան մասնագիտական գիտելիքներին և աշխատանքային ունակություններին տիրապետող դիվանագետների առաջխաղացման համար: Նաև, սահմանելով 15 տարվա ստաժի պահանջ՝ օրենսդրական այս կարգավորումը նպաստում է դիվանագիտական ծառայության պատասխանատու պաշտոններում ավելի փորձառու դիվանագետների նշանակմանը՝ որպես երաշխիք ՀՀ արտաքին քաղաքական շահի խթանման համար:
ԱԳ փոխնախարար Գրիգոր Հովհաննիսյանը նշեց, որ Կառավարությունն առաջարկել է 15 տարվա փոխարեն 10 տարվա ստաժի պահանջ սահմանել:
«Դուք ովքե՞ր եք, որ հնարավորություն եք տալիս: Տպավորություն է, որ պետք է ասենք՝ շնորհակալություն, որ Կառավարությանն այդ հնարավորությունը տալիս եք»,- միջամտեց ՀՀ վարչապետ Նիկոլ Փաշինյանը:
Նա հարցադրում արեց, թե ինչո՞ւ պետք է 10-15 տարի նախարար, ԱԺ նախագահ, փոխնախագահ, պատգամավոր կամ ԵԽԽՎ-ում աշխատած անձը գնա հանձնաժողովի կարծիքը ստանալու, իսկ որևէ դեսպանատան կցորդին հարցեր չպետք է տրվեն հանձնաժողովում: «Էստեղից էլ ծագում է «մենք»-ի ու «դուք»-ի կարգավիճակը: «Մենք»-ը դիվանագիտական կորպուսն է, որ մեծահոգաբար թույլ է տալիս, որ այդտեղ Կառավարությունը նշանակի, բայց ասում է՝ մի հատ էլ կգնաս հանձնաժողով»,- ասաց Փաշինյանը:
Հիշեցնելով, որ ինքն է առաջ քաշել դրույթը, որ քաղաքական նշանակումները պետք է սահմանափակվեն, Նիկոլ Փաշինյանը նշեց, որ այս դեպքում խտրական մոտեցում է ստացվում: Ըստ նրա, եթե խորհրդարանական ֆիլտրով պետք է անցնեն, ապա պետք է անցնեն բոլորը, եթե ոչ, ուրեմն բոլորը չպետք է անցնեն. «Էստեղ էլ հակառակ դիսկրիմինացիան ենք անում, էլի բաժանում ենք առաջին և երկրորդ սորտի դեսպանների և թեկնածուների»:
Գրիգոր Հովհաննիսյանը նկատեց, որ խտրականությունը միայն նրանում է, որ դիվանագիտական ներկայացուցչություններում աշխատանքը նաև կարգի ուսուցում է, որ պետք է անցնել:
«Ո՞վ է տալիս էդ երաշխիքը, որ ինքը սովորել է»,- հարցրեց վարչապետը՝ հավելելով, որ այս ընթացքում կոպիտ թերություններ է տեսել, որ լուրջ հարցեր են առաջացնում. «Ես ընդհանրապես էդ բաներին կողմ չեմ, որ ինչ-որ կաստայական կառուցվածքներ են ձևավորվում, որ 10 տարի էս դռնով մտել, դուրս ես եկել, ուրեմն վերջ, դու էլ խնդիր չունես: Ես դրա հետ համաձայն չեմ»:
Մանրամասները՝ տեսանյութում:
Նարեկ Կիրակոսյան
