Ում ուզում եմ՝ փող եմ տալիս, ում ուզում եմ՝ չեմ տալիս. Արմեն Թավադյանը՝ ցուցարարներին գումար տալու մասին

Ես ում ուզում՝ փող եմ տալիս, ում ուզում՝ չեմ տալիս: Factor.am-ի հետ զրույցում ասաց Ռոբերտ Քոչարյանի աջակից Արմեն Թավադյանը՝ պատասխանելով հարցին, որ կա քաղաքացի, որը հայտարարում է, որ մասնակցել է Քոչարյանի համար կազմակերպվող ցույցերին, բայց Թավադյանի կողմից խոստացված գումարը չի ստացել:

«Գնացեք այդ մարդու շրջան, ինֆորմացիա հավաքեք և Ձեր տպավորությունները կստանաք: Ես ում ուզում՝ փող եմ տալիս, ում ուզում՝ չեմ տալիս: Երկրում չեք գտնի մի մարդ, ում ես բան եմ խոսք տվել և չեմ արել կամ խաբել եմ: Պարզ երևում էր, որ սարքած գործ է, ակնհայտ երևում էր»,- մանրամասնեց Արմեն Թավադյանը:

Հիշեցնենք, որ «ՍիվիլՆեթ»-ն ու «Առաջին ալիքը» հարցազրույց են հրապարակել Արարատի մարզի բնակիչ Հարություն Մանուկյանի հետ, որը նշել է՝ իրեն առաջարկվել է մասնակցել Եվրոպական արժեքների արատավորման կենտրոնի Արտաշատի մասնաճյուղի ստեղծմանը: Սակայն հետո պարզվել է, որ այդ կառույցների աշխատակիցները պետք է մասնակցեն Ռոբերտ Քոչարյանի համար կազմակերպվող ցույցերին: Հարություն Մանուկյանը նաև նշել էր, որ իր աշխատավարձի չափն անձամբ պայմանավորվել է Արմեն Թավադյանի հետ:

Արմեն Թավադյանից նաև հետաքրքրվեցինք՝ վճարե՞լ է, որ այդ քաղաքացին մարդիկ բերի ի աջակցություն Ռոբերտ Քոչարյանի: «Ձեր ինչի՞ն է»,- պատասխանեց Թավադյանը: Հստակեցմանը, որ Հարություն Մանուկյանը «Առաջին ալիքին» և «ՍիվիլՆեթ»-ին տված հարցազրույցներում մեղադրանքներ է հնչեցրել, որ իրեն խոստացված գումարները չեն տվել, Արմեն Թավադյանը պատասխանեց. «Նա շատ պուճուր մարդ է, որ ինձ ինչ-որ բանում մեղադրի»:

Արմեն Թավադյանը, միաժամանակ, վստահեցրեց, որ ի աջակցություն Ռոբերտ Քոչարյանի կազմակերպվող ցույցերին գումարով մասնակցող մարդիկ չկան: Նաև ասաց, որ այդ հարցը՝ գումարով ցույցերին մասնակցելու, ոչ մեկի չի հետաքրքրում և հանրային հետաքրքրություն չի ներկայացնում:

Մանրամասները՝ տեսանյութում:

Նարեկ Կիրակոսյան