12.11.2024 | 23:27
Գրետա Թունբերգը ժամանել է Հայաստան
Պոմպեոն չի բացառել Իրանի դեմ ռազմական ուժի կիրառման հնարավորությունը
Քաղաքականություն
17.06.2019 | 14:49
ԱՄՆ-ի դիտարկում է Իրանին հակազդեցության բոլոր տարբերակները, այդ թվում՝ ուժային: CNN-ին տված հարցազրույցում այս մասին հայտարարել է ԱՄՆ պետքարտուղար Մայք Պոմպեոն: Նրա խոսքով՝ Վաշինգտոնը կհասնի նրան, որ Թեհրանը միջուկային զենք չունենա, հաղորդում է RT-ն:
«Միացյալ Նահանգները դիտարկում է Իրանին հակազդելու բոլոր տարբերակները: Վստահ ենք, որ կկարողանանք մի շարք գործողություններ ձեռնարկել»,- ասել է նա: Հստակեցնող հարցին՝ որպես տարբերակ՝ Վաշինգտոնը դիտարկո՞ւմ է ուժի կիրառումը, պետքարտուղարը պատասխանել է. «Իհարկե՛»:
Նա, միաժամանակ, ընդգծել է, որ ԱՄՆ նախագահը դեմ է ուժային սցենարին, թեև Դոնալդ Թրամփն ավելի վաղ չէր բացառել Թեհրանի նկատմամբ ուժի կիրառման հնարավորությունը:
Մայք Պոմպեոն նշել է նաև, որ Իրանի հանդեպ ԱՄՆ-ի քաղաքականության նպատակն է՝ թույլ չտալ, որ Թեհրանը միջուկային զենք ունենա:
ԱՄՆ արտաքին քաղաքական գերատեսչության ղեկավարը նաև Իսլամական Հանրապետությանը մեղադրել է հունիսի 13-ին Օմանի ծոցում լցանավերի վրա հարձակման համար՝ հավելելով, որ ապացույցները կներկայացնի ավելի ուշ:
«Այն, ինչ տեղի է ունեցել, միանգամայն պարզ է. դա Իրանի կողմից հարձակում էր առևտրային նավագնացության և ծովագնացության ազատության դեմ: Կասկածներ չկան: Հետախուզությունը բազմաթիվ ապացույցներ ունի, աշխարհը կտեսնի դրանք»,- ասել է նա:
Թեհրանում կարծում են, որ նման մեղադրանքներով Վաշինգտոնը փորձում է արդարացնել Իրանի դեմ սահմանված տնտեսական պատժամիջոցները:
