«ՍԱՍ»-ի Արտակը իշխանության հենարաններից է, ի սկզբանե պարզ էր՝ պատիժ չի լինի. Ավետիք Իշխանյան

Այն անձինք, որոնք պատրանքներ ունեին, որ «ՍԱՍ»-ի աղմկահարույց ձայնագրության փաստով հարուցված գործը շարունակություն կունենա, չեն պատկերացնում Հայաստանի քաղաքական համակարգը: Այս մասին Factor.am-ի հետ զրույցում հայտարարեց Հայաստանի Հելսինկյան կոմիտեի նախագահ Ավետիք իշխանյանը:

Հիշեցնենք՝ այսօր հայտնի դարձավ, որ Հատուկ քննչական ծառայությունը կարճել է «ՍԱՍ»-ի աղմկահարույց ձայնագրության փաստով հարուցված քրեական գործը:

«Հայաստանում քաղաքական համակարգը հետևյալն է՝ իշխանությունը պահել ամեն գնով և իշխանության հենարաններին որևէ ձևով չվիրավորել: Հաշվի առնելով, որ «ՍԱՍ»-ի Արտակը իշխանության հիմնական հենարարններից մեկն է, իսկ Հայաստանում հիմնական հենարաններն են ֆինանսական բուրգերը և իրավապահ մարմինները, ապա պատժել հենարաններից որևէ մեկին, կնշանակի` ճոճել ամբողջ քաղաքական համակարգը»,- նշեց իրավապաշտպանը՝ հավելելով, որ ի սկզբանե գործի նման հանգուցալուծումը սպասելի էր:

Ըստ Իշխանյանի՝ եթե Հայաստանը լիներ իրավական պետություն, ապա այդ սենսացիոն բացահայտումից հետո Արտակ Սարգսյանն առնվազն պետք է հրաժարվեր իր պատգամավորական մանդատից: «Այն, որ նա չհրաժարվեց մանդատից և շարունակեց մնալ նախագահի մերձավորներից, դրանից հետո թյուրիմացություն էր կարծել, որ պատիժ կլինի»,- շարունակեց Իշխանյանը՝ պնդելով, որ քրեական գործն էլ ձևական էր հարուցված:

Իրավապաշտպանն անդրադարձավ նաև նախագահ Սերժ Սարգսյանի կողմից Հրազադանի քաղաքապետի որդուն ոսկե մեդալ շնորհելու փաստին՝ շեշտելով, որ Հայաստանում գործում է ընտրովի արդարադատություն: «Եթե չեմ սխալվում, ցմահ ազատազրկման դատապարտված Մհեր Ենոքյանը բավականին բարձր առաջադիմություն ունի, հնարավո՞ր է՝ նա նույնպես մեդալ ստանա նախագահի կողմից, իհարկե` ոչ »,- հավելեց Հայաստանի Հելսինկյան կոմիտեի նախագահը:

Հարցազրույցն ամբողջությամբ՝ տեսանյութում:

Շողիկ Գալստյան