Հասարակություն
08.09.2017 | 20:07Այս տարվա հուլիսի 19-ի վաղ առավոտից շինարարական տեխնիկա գործի դրվեց Ֆիրդուսի տոնավաճառում։ Այն, որ տոնավաճառը ապամոնտաժվելու էր, նորություն չէր տոնավաճառի առևտրականների համար, բայց միևնույն է, նրանք մինչև վերջին պահը փորձում էին դիմադրել: Ապամոնտաժման աշխատանքները մի քանի ժամով ընդհատվեցին, շինտեխնիկան հեռացվեց, սակայն դեռ չէին հասցրել առևտրականները նորից բացել տաղավարները, երբ ծանր տեխնիկան կրկին գործի դրվեց։ Օրվա ավարտին Ֆրիդուսի տոնավաճառն այլևս պատմություն էր։
Չնայած քաղաքապետ Տարոն Մարգարյանի հանձնարարականով քաղաքապետարանի առևտրի և սպասարկման վարչությունը բանակցություններ էր սկսել մայրաքաղաքում գործող տոնավաճառների և շուկաների սեփականատերերի հետ, սակայն ֆիրդուսի առևտրականները պնդում էին՝ այլ տոնավաճառներում առևտուր չկա։
Factor.am-ն այսօր այցելեց տոնավաճառի տարածք, որտեղ դեռ մի քանի առևտրականներ իրենց տաղավարներով մնացել են։ Նրանցից շատերը հրաժարվեցին տեսանկարահանվել՝ ասելով, եթե քաղաքապետարանից տեսնեն այստեղ ենք, գալու են հեռացնեն տաղավարները։ Մի կին համաձայնեց խոսել․ պարզվեց տոնավաճառում գործելու իր վերջին օրն է։
Հետաքրքրվեցինք՝ եթե այլ տոնավաճառներում արտոնյալ պայմաններով ձեզ ընդունում են ինչո՞ւ չեք գնում, մեր զրուցակիցները տեսախցիկից այն կողմ ասացին՝ այլ տոնավաճառում առևտուր չի լինում, տոնավաճառներ տեղափոխված առևտրականները «լացում» են։
Այժմ Ֆիրդուսի առևտրականների մի մասը գործունեություն է ծավալում «Երևան» տոնավաճառում, որտեղ էլ փոքրիկ հարցախույզ իրականացրինք։ Առևտրականներն ասացին, որ գոհ են իրենց պայմաններից՝ վստահեցնելով, որ իրենց հաճախորդները օգտնվում են այս տոնավաճառից, թեև նկատենք, որ մեր գտնվելու ընթացքում տոնավաճառն այնքան էլ բազմամարդ չէր։
Առավել մանրամասն՝ տեսանյութով։
Սեդա Ղուկասյան
