08.11.2026 | 17:07
Ադրբեջանի պաշտպանության նախարարը կորոնավիրուսով է վարակվել
Ղազախստանում նախագահական ընտրություններից ի վեր 957 մարդ է ձերբակալվել
Քաղաքականություն
13.06.2019 | 16:12
Ղազախստանում հունիսի 9-ին անցկացված նախագահական ընտրություններից ի վեր 957 մարդ է ձերբակալվել կամ վարչական պատասխանատվության ենթարկվել՝ չարտոնված բողոքի ակցիաներին մասնակցելու համար: Այս մասին այսօր հրավիրված ճեպազրույցում հայտնել է Ղազախստանի գլխավոր դատախազության հանրային շահերի պաշտպանության ծառայության ղեկավար Սափարբեկ Նուրպեիսովը, գրում է «Ինտերֆաքս»-ը:
Ձերբակալվածներից 670-ը վարչական կալանքի է ենթարկվել, 115-ը՝ տուգանվել, 172-ը՝ զգուշացում ստացել:
Գլխավոր դատախազությունը բազմիցս է նախազգուշացրել անօրինական ցույցերի անթույլատրելիության մասին, սակայն, ըստ գերատեսչության ներկայացուցչի, «սադրանքի տրվելով՝ առանձին անձինք մայրաքաղաքում և այլ քաղաքներում բողոքի ակցիայի են դուրս եկել»:
Նշենք, որ Ալմաթիում և Նուր-Սուլթանում չարտոնված բողոքի ակցիաներ են անցկացվել՝ կոչ անելով բոյկոտել նախագահական ընտրությունները: Քվեարկության օրը ոստիկանությունն այս քաղաքներում շուրջ 500 մարդու է ձերբակալել, երկուշաբթի՝ ևս 200-ին:
Հունիսի 12-ի երեկոյան՝ նորընտիր նախագահ Կասիմ-Ժոմարտ Տոաևի երդմնակալության օրը, Ալմաթիի ոստիկանությունը կասեցրել է չարտոնված ակցիան, որի կազմակերպիչը համարվում է արտերկրում թաքնվող նախկին բանկիչ Մուխտար Աբլյազովը: Նրա հիմնած «Ղազախստանի ժողովրդավարական ընտրություն» քաղաքական կազմակերպությունն արգելված է այս երկրում:
