14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Մերձավորիս հարբած ոստիկանները խոշտանգել են. Դավիթ Խաժակյան. ՏԵՍԱՆՅՈՒԹ
Հասարակություն
07.06.2019 | 12:12
Երևանի ավագանու «Լույս» խմբակցության ղեկավար Դավիթ Խաժակյանը ֆեյսբուքյան ուղիղ եթերում, իր խոսքով, հաղորդում է ներկայացրեց հանցագործության մասին։
Ըստ Խաժակյանի՝ երեկ ուշ երեկոյան միջադեպ է տեղի ունեցել իր ազգականի հետ։
«Երեկ ուշ երեկոյան միջադեպ է տեղի ունեցել. մերձավորներիցս մեկին ուշ երեկոյան, երբ նա կողպելիս է եղել իր վարձակալած տարածքի դուռը, մոտեցել են երկու հարբած սևազգեստ անձինք և ներկայացել որպես ոստիկանության աշխատակից: Մերձավորիս հարցրել են՝ ո՞վ է, ի՞նչ է անում այս տարածքում և նշել, որ ցանկանում է թալանել տարածքը, ինչից հետո մերձավորս նրանցից պահանջել է նախ ներկայանալ։ Վերջիններս ներկայացել են որպես ոստիկանության աշխատակիցներ և ներկայացրել իրենց վկայականները: Ոստիկանության այդ աշխատակիցները հարվածելով և քաշքշելով ազգականիս նստեցրել են մեքենայի մեջ և տարել Ոստիկանության բաժին, որտեղ նրանց են միացել ևս մի քանի ոստիկաններ և հարվածներ հասցրել նրան։ Այդ պահին նրանց է մոտեցել մեկ այլ ոստիկան, ով հասկացել է, որ այդ մարդը՝ ազգականս, իսկապես այդ տարածքի տիրապետողն է, ինչից հետո նրան բաց են թողել»,- ֆեյսբուքյան ուղիղի եթերում պատմեց Դավիթ Խաժակյանը։
Ավագանու անդամը կրկին շեշտեց, որ իր ազգականին հարվածած սևազգեստ անձինք եղել են ոստիկաններ, նրանց հասցրած հարվածներից իր ազգականը ստացել է քթի կոտրվածք, ինչը հաստատող բժշկական փաստաթուղթն առկա է։
«Ես ակնկալում եմ, որ այդ սևազգեստների վրա, ոստիկանապետի հրահանգով, պետք է կապվեն գույնզգույն բաբոչկաներ և նրանք պետք է իրենց պատիժը կրեն»,- ասաց Խաժակյանը։
Մանրամասները՝ տեսանյութում:
