30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ՄԱԿ-ն իր անձնակազմի մի մասին տարհանում է Սուդանից
Քաղաքականություն
06.06.2019 | 12:23
ՄԱԿ-ը որոշել է իր անձնակազմի մի մասին հետ կանչել Սուդանից: Անվտանգության նկատառումներից ելնելով՝ կտարհանվի երկրորդային օղակի անձնակազմը: Այս մասին գրում է ՏԱՍՍ-ը՝ վկայակոչելով Sky News Arabia-ն:
Չորեքշաբթի Խարթումից դիվանագիտական անձնակազմի մի մասին տարհանելու մասին հայտարարել է նաև Մեծ Բրիտանիան: Լոնդոնը նաև Սուդանում գտնվող բրիտանահպատակներին զգոնության կոչ է արել՝ կապված մայրաքաղաքում իրադրության սրման հետ:
Հիշեցնենք, որ ապրիլի 11-ին, տնտեսական ծանր իրադրության ֆոնին անցկացված երկարատև ակցիաներից հետո, Սուդանի բանակն իշխանությունից հեռացրեց 30 տարի երկիրը ղեկավարած Օմար ալ-Բաշիրին և ստանձնեց պետության ղեկը, ժամանակավոր Ռազմական խորհուրդ ստեղծեց, ցրեց խորհրդարանն ու դադարեցրեց Սահմանադրության գործողությունը:
Ընդդիմադիր ուժերը կոչ արեցին արագորեն քաղաքացիական կառավարություն ձևավորել և գործադուլ սկսեցին:
Հունիսի 3-ին Սուդանի ոստիկանությունն ու հատուկ նշանակության ջոկատը ցրեց Խարթումում զինված ուժերի գլխավոր հրամանատարության կենտրոնակայանի մոտ տեղակայված վրանային ճամբարի մի մասը, որտեղ արդեն երկու ամիս է՝ նստացույց է անցկացվում: Ընդդիմության տվյալներով՝ ուժայինների գործողությունների հետևանքով առնվազն 100 մարդ է զոհվել:
Դրանից հետո իրադրությունը Սուդանի մայրաքաղաքում կտրուկ սրվեց: Ցուցարարները փակեցին քաղաքի հիմնական ճանապարհները, բարիկադներ կազմեցին և հայտարարեցին Ռազմական խորհրդի հետ երկխոսությունը դադարեցնելու մասին:
