08.11.2026 | 20:08
Վայքի և Սիսիանի տարածաշրջաններում ձյուն է տեղում
Զելենսկին «Ղրիմի վերադարձի ռազմավարություն» է մշակում
Քաղաքականություն
04.06.2019 | 13:06
Ուկրաինայի նախագահ Վլադիմիր Զելենսկին ծրագրում է Բրյուսել այցի ընթացքում Ղրիմի վերադարձի ռազմավարությունը քննարկել: Ռազմավարության մանրամասների մասին ոչինչ չի նշվում, սակայն հայտնի է, որ Ուկրաինայի այժմյան ղեկավարության դիրքորոշումը չի փոխվել. Կիևը Ղրիմն ուկրաինական տարածք է համարում և մտադիր է հասնել դրա վերադարձին, գրում է Gazeta-ն:
Զելենսկին հարցը Բրյուսելում քննարկելու է Եվրամիության և ՆԱՏՕ-ի պաշտոնյաների հետ, հայտնել է Ուկրաինայի նախագահի մամլո քարտուղար Յուլիա Մենդելը:
«Վարչակազմը ցանկանում է թափանցիկ լինել, բայց խոսել շատ զգայուն ինչ-որ լուրերի կամ լուծումների մասին՝ մինչ որոշման ընդունումը, չէինք ցանկանա»,- ասել է Մենդելը:
Ղրիմի հարցով դիրքորոշման մասին Զելենսկին խոսել էր դեռևս մայիսի 20-ին, երդմնակալության ժամանակ՝ թերակղզին ու Դոնբասն «ուկրաինական հող» անվանելով: Նա ընդգծել է, որ իրեն վստահված պետությունը ոչ միայն տարածքներ, այլև մարդկանց է կորցրել. «Եվ այսօր մենք պարզապես պետք է վերադարձնենք նրանց գիտակցությունը: Այս տարիների ընթացքում իշխանությունը ոչինչ չի արել, որպեսզի նրանք իրենց ուկրաինացի զգան: Նրանք օտար չեն, նրանք մերն են»:
Ռուսաստանից արդեն արձագանքել են Զելենսկու մտադրությանը: Ղրիմից Պետդումայի պատգամավոր Ռուսլան Բալբեկը «ՌԻԱ Նովոստի Ղրիմ»-ին ասել է, որ «Արևմուտքն ի վիճակի չէ Ուկրաինային օգնել Ղրիմը վերադարձնելու հարցում», այդ պատճառով թերակղզու վերադարձի «ռազմավարության մասին հայտարարություններ անելով՝ նախագահ Վլադիմիր Զելենսկին» վնաս է հասցնում իր վարկանիշին:
«Ղրիմն այնքան վերադարձնողներ են եղել, որ ես արդեն կորցրել եմ հաշիվը: Այդ պատճառով անկեղծորեն չեմ հասկանում՝ ինչո՞ւ է Զելենսկին վնասում իր վարկանիշին: Նրանք ուժով Ղրիմը չեն վերցնի: Արևմուտքի ճնշումը Ռուսաստանի քաղաքականության վրա չի ազդում»,- մասնավորապես ասել է Բալբեկը:
