30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Դոնալդ Թրամփը Լոնդոնի քաղաքապետին «անզգա անհաջողակ» է անվանել
Քաղաքականություն
03.06.2019 | 16:38
ԱՄՆ նախագահ Դոնալդ Թրամփը քննադատել է Լոնդոնի քաղաքապետ Սադիկ Խանին՝ նրան անվանելով «անզգա անհաջողակ»: Դա տեղի է ունեցել այն բանից հետո, երբ Լոնդոնի քաղաքապետը քննադատել է բրիտանական կառավարությանը՝ Թրամփին պետական այցով Մեծ Բրիտանիա հրավիրելու համար, գրում է «Կոմսոմոլսկայա պրավդա»-ն:
Թրամփի խոսքով՝ Սադիկ Խանը ոչ միայն վատ է աշխատում, այլև իր դեմ չարամտորեն է տրամադրված:
«Լոնդոնի քաղաքապետի պաշտոնում Խանը բոլոր առումներով իրեն վատ է դրսևորել և անմիտ թշնամանք դրսևորել՝ կապված Միացյալ Թագավորության ամենակարևոր գործընկերոջ՝ ԱՄՆ-ի նախագահի այցի հետ»,- Թվիթերի իր միկրոբլոգում գրել է Թրամփը:
ԱՄՆ նախագահը Լոնդոնի քաղաքապետին Նյու Յորքի քաղաքապետ Բիլ դե Բլազիոյի հետ է համեմատել. վերջինը ևս մշտապես քննադատում է Թրամփին:
«Նա անզգա անհաջողակ է, որը պետք է ուշադրությունը կենտրոնացնի Լոնդոնի հանցագործությունների վրա, այլ ոչ իմ»,- նշել է ԱՄՆ նախագահը:
Նշենք, որ Լոնդոնի քաղաքապետը մեկ անգամ չէ, որ քննադատել է իշխանությունների՝ Դոնալդ Թրամփին պետական այցով Մեծ Բրիտանիա հրավիրելու որոշումը: Նա դժգոհ է ԱՄՆ նախագահի միգրացիոն կոշտ քաղաքականությունից:
ԱՄՆ նախագահ Դոնալդ Թրամփի պետական այցը Մեծ Բրիտանիա մեկնարկել է այսօր: ԱՄՆ նախագահին ու առաջին տիկնոջը Լոնդոնում ընդունել է Եղիսաբեթ 2-րդ թագուհին: Սա Թրամփի երկրորդ այցելությունն է Մեծ Բրիտանիա։ Մինչ այս էլ տեղեկություն էր ստացվել այն մասին, որ բրիտանացիները պատրաստվում են ԱՄՆ նախագահին զանգվածային ցույցերով դիմավորել։
Նելլի Մելքոնյան
