30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՊԼ գլխավոր քարտուղարը՝ Իրան-ԱՄՆ պատերազմից խուսափելու պայմանի մասին
Քաղաքականություն
31.05.2019 | 13:17
Իրանը կարող է խուսափել ԱՄՆ-ի հետ ռազմական առճակատումից, եթե դադարի միջամտել տարածաշրջանի երկրների ներքին գործերին: Արաբական պետությունների լիգայի (ԱՊԼ) արտակարգ գագաթնաժողովից հետո այս մասին հայտարարել է կազմակերպության գլխավոր քարտուղար Ահմեդ Աբու ալ-Գեյթը, գրում է ՏԱՍՍ-ը:
«ԱՄՆ-ն որոշել է ռազմածովային ուժեր ու այլ զորքեր ուղարկել՝ Իրանի ագրեսիային հակազդելու համար, բայց պատերազմ չի ուզում: Եկեք իրադարձություններից առաջ չընկնենք: Կապրենք՝ կտեսնենք»,- ասել է նա:
Նա հավելել է, որ Իրանից պահանջում են դադարեցնել արաբների ներքին գործերին միջամտությունը և վերանայել տարածաշրջանում իր պահվածքը. «Եթե դա տեղի ունենա, չեմ կարծում, որ ԱՄՆ-ի և Իրանի միջև թշնամական և ռազմական գործողությունների անհրաժեշտություն կլինի»:
Իրանի ԱԳՆ-ն արձագանքել է ԱՊԼ գլխավոր քարտուղարի հայտարարությանը՝ հերքելով Պարսից ծոցի երկրների ներքին գործերին միջամտելու մասին Թեհրանի հասցեին հնչած մեղադրանքներն ու դատապարտելով արաբական երկրների դիրքորոշումը:
«Ցավում ենք, որ Մեքքայում անցկացված գագաթնաժողովի ընթացքում (ԱՊԼ-ի և ՊԾՀԽ-ի) Սաուդյան Արաբիան չարաշահեց իր լիազորությունները՝ օգտագործելով իր քաղաքական ազդեցությունը: Հերքում և դատապարտում ենք Պարսից ծոցի մի շարք երկրների անհիմն հայտարարությունները: Գագաթնաժողովների ամփոփիչ հայտարարությունը չի արտահայտում բոլոր մասնակիցների կարծիքը»,- ասել է Իրաի ԱԳՆ պաշտոնական ներկայացուցիչ Աբբաս Մուսավին:
Նշենք, որ ԱՄՆ-ն, որպես Թեհրանին ուղղված ազդակ, USS Abraham Lincoln ավիակրի գլխավորությամբ ՌԾՈՒ հարվածային խումբ է ուղարկել ԱՄՆ Զինված ուժերի կենտրոնական հրամանատարության պատասխանատվության գոտի, որում ներառված են Մերձավոր Արևելքն ու Կենտրոնական Ասիան: Վաշինգտոնում ընգծել են, որ չեն ձգտում Իրանի հետ առճակատման, սական պատրաստ են պաշտպանել տարածաշրջանում ԱՄՆ-ի շահերը:
