Ռուսաստանն արագացրել է ԵՏՄ երկրների միջև ռոումինգի վերացման աշխատանքը. ՌԴ փոխվարչապետ

Ռուսաստանն արագացրել է ԵՏՄ երկրների ներսում ռոումինգի փուլային վերացման ուղղությամբ աշխատանքը: Այս մասին ՌԴ վարչապետ Դմիտրի Մեդվեդևի մոտ անցկացված խորհրդակցության ժամանակ ասել է այդ երկրի փոխվարչապետ Մաքսիմ Ակիմովը, գրում է ՏԱՍՍ-ը։

«Երկու օր անց՝ մայիսի 29-ին մենք նշելու ենք Եվրասիական տնտեսական միության պայմանագրի ստորագրման 5-ամյակը, և Ձեր հանձնարարությամբ ավելի ինտենսիվ ենք դարձրել ռոումինգի փուլային վերացման աշխատանքը միության երկրների հետ»,- նշել է Ակիմովը:

Նա հիշեցրել է, որ 2017 թվականի հունիսին Եվրամիության երկրների միջև ռոումինգի չեղարկումն ինտեգրման գործընթացներում դրական դեր է խաղացել։

Մաքսիմ Ակիմովի խոսքով՝ ԵՏՄ տարածքում ռոումինգի վերացումը երկարատև գործընթաց է, և կարևոր է, որ ռուսական կապի օպերատորները չտուժեն:

«Առաջին քայլը զանգերի ավարտի սպասարկման շուրջ միասնական սակագնային տարածքի ստեղծման մասին համաձայնագրի ընդունումը կլինի։ Փաստաթղթի նախագիծը Ռուսաստանն է ներկայացրել, մշակվում է Եվրասիական տնտեսական հանձնաժողովի կողմից, և մենք հույս ունենք, որ այս տարի փաստաթուղթը կհամաձայնեցնենք՝ արագ ստորագրման համար»,- նշել է ՌԴ փոխվարչապետը:

Մեդվեդևը նշել է, որ այդ գործընթացին պետք է «ինչպես հարկն է պատրաստվել» և միայն ռոումինգը հանելով չսահմանափակվել. պետք է ընդունել ծառայությունների մատուցման միասնական չափորոշիչներ՝ ներառյալ ներռուսական ռոումինգի չեղարկումը, ինչպես նաև պատրաստվել 5-րդ սերնդի կապի ներդրմանը:

«Հաշվի առնելով այն, որ մենք ստեղծում ենք միասնական տնտեսական տարածք, պետք է մտածել նաև այն մասին, որպեսզի 5G կապն ի վերջո աշխատի նաև Եվրասիական միության ձևաչափում»,- ասել է ՌԴ փոխվարչապետը: