Ցիպրասը հայտարարել է Հունաստանում արտահերթ խորհրդարանական ընտրություններ անցկացնելու մասին

Հունաստանի վարչապետ Ալեքսիս Ցիպրասը հայտարարել է երկրում արտահերթ խորհրդարանական ընտրություններ անցկացնելու մասին: ՏԱՍՍ-ի փոխանցմամբ՝ կառավարության ղեկավարն այս մասին հայտնել է այն բանից հետո, երբ կիրակի տեղի ունեցած Եվրախորհրդարանի ընտրություններում իր գլխավորած ՍԻՐԻԶԱ կուսակցությունը 9%-ով զիջել է «Նոր ժողովրդավարություն» ընդդիմադիր կուսակցությանը:

Միաժամանակ, կիրակի անցկացվել են քաղաքապետերի, նահանգապետերի և տարածքային խորհուրդների անդամների ընտրությունները: Երկրորդ փուլը հունիսի 2-ին է:

«Տեղական մարմինների ընտրությունների երկրորդ փուլից անմիջապես հետո ես Հունաստանի նախագահին կխնդրեմ անհապաղ համընդհանուր ընտրություններ հայտարարել»,- ասել է Ցիպրասը:

Վարչապետը հայտարարել է, որ չորս տարի կառավարությունն աննախադեպ դժվարություններ է հաղթահարել, հոսանքի դեմ գնացել:

«Մենք երկիրը դուրս բերեցինք հուշագրերի ճիրաններից (ֆինանսական օգնության մասին միջազգային վարկատուների հետ): Մեզ, վերջապես, հաջողվեց հաստատուն ոտքի կանգնել, և երբ ազատորեն շունչ քաշեցինք, հույս ժողովրդին մեր հայրենիքի ապագայի ծրագիր ներկայացրեցինք»,- ընդգծել է վարչապետը:

Ալեքսիս Ցիպրասը նաև հավելել է, որ ընտրությունների արդյունքներն իրեն չեն բավարարում, և ինքը չի պատրաստվում անտեսել դրանք:

Հունաստանի ՆԳՆ-ի տվյալներով՝ 28.06% քվեաթերթիկների հաշվարկից հետո «Նոր ժողովրդավարությունը» 33.25% ձայն է հավաքել և Եվրախորհրդարանում 7 տեղ կունենա, իսկ իշխող ՍԻՐԻԶԱ-ն՝ 23.92% ձայն (6 տեղ):