01.05.2026 | 10:48
«Զեբրն» իրականում ներկված ավանակ էր․ կենդանաբանական այգուց կենդանի չի փախել
BBC-ն երգիծական թոք-շոու կհեռարձակի՝ «Այս երեկոն՝ Վլադիմիր Պուտինի հետ»
Քաղաքականություն
24.05.2019 | 14:15
Բրիտանական BBC-ն երգիծական թոք-շոու կհեռարձակի՝ «Այս երեկոն՝ Վլադիմիր Պուտինի հետ»: Այս մասին տեղեկանում ենք հեռուստաընկերության պաշտոնական կայքից:
Մինչ հեռարձակումը՝ BBC-ն տարածել է հաղորդման գովազդային հոլովակը, որտեղ Պուտինի նմանությամբ պատրաստված տիկնիկը Բուքինգեմյան պալատի առջև կանգնած հայտարարում է, որ վերջապես հասել է իր աշխարհաքաղաքական թիվ մեկ նպատակին:
«1980-ականներին, երբ երիտասարդ էի, ԱԱԾ գրասենյակում միակ մարդն էի, որ գիտեի Արևմուտքի արգելված բարիքների՝ ջինսե տաբատների, ռոք-ըն-ռոլի և Թերի Վոգանի մասին: Ես շատ մեծ հաղթանակներ եմ ունեցել, բայց դրանցից ոչ մեկն ինձ այնքան երջանիկ չի դարձրել, որքան այս մեկը՝ ամենաառաջատար թոք-շոուն Մեծ Բրիտանիայում»,- ասում է տիկնիկը:
BBC-ն դեռ չի հաստատել շոուի հեռարձակման ամսաթիվը: Այդուհանդերձ, մինչ հեռարձակման մեկնարկը հայտարարություն է տարածել:
«Մոռացե՛ք համաշխարհային քաղաքականության մասին: Համաշխարհային ճանաչում ունեցող այս շոուն ազատ աշխարհի առաջնորդ Վլադի վերջնական հաղթանակն է նշանավորում»,- ասվում է հաղորդագրության մեջ:
BBC-ի փոխանցմամբ՝ շոուն կիսապաշտոնական ձևաչափով և երգիծական է լինելու: Հաղորդման ընթացքում Ռուսաստանի նախագահ Վլադիմիր Պուտինի եռաչափ թվային տիկնիկը շրջելու է տաղավարում և հարցազրույցներ է վարելու իրական հյուրերի հետ:
Նելլի Մելքոնյան
