16.01.2026 | 22:00
Վթար Էջմիածին-Երևան ճանապարհին. 4 տուժած հոսպիտալացվել է
Բիշքեկում մեկնարկել է ՇՀԿ ԱԳ նախարարների խորհրդի նիստը. դրան կհետևի ՀԱՊԿ ԱԳՆ ղեկավարների խորհրդինը
Քաղաքականություն
22.05.2019 | 13:49
Բիշքեկում մեկնարկել է Շանհայի համագործակցության կազմակերպության (ՇՀԿ) անդամ պետությունների ԱԳ նախարարների խորհրդի նիստը: Այս տարի կազմակերպությունում նախագահում է Ղրղզստանը:
«Sputnik Ղրղզստանի» փոխանցմամբ՝ երկրի ԱԳ նախարար Չինգիզ Այդարբեկովը նիստի մեկնարկին առաջարկել է քննարկել կազմակերպության ընթացիկ գործունեությանը վերաբերող հարցեր, ինչպես նաև կարծիք փոխանակել միջազգային և տարածաշրջանային արդիական հարցերի շուրջ:
«Իր նախագահության ընթացքում Ղրղզստանը նպատակ է դրել իրականացնել կազմակերպության առջև դրված առաջնահերթ խնդիրները, ինչպես նաև ՇՀԿ-ի հետագա զարգացմանը նպաստելը»,- ասել է Այդարբեկովը:
Նշենք, որ ՇՀԿ-ի ԱԳ նախարարների խորհրդի նիստից հետո կանցկացվի նաև Հավաքական անվտանգության պայմանագրի կազմակերպության (ՀԱՊԿ) անդամ պետությունների ԱԳ նախարարների խորհրդի նիստը, որին մասնակցելու նպատակով Բիշքեկ է մեկնել նաև ՀՀ ԱԳՆ ղեկավար Զոհրաբ Մնացականյանը:
Նախատեսվում է, որ մասնակիցները կքննարկեն նաև ՀԱՊԿ նոր գլխավոր քարտուղարի նշանակման հարցը: Այդ պաշտոնի միակ թեկնածուն Բելառուսի Անվտանգության խորհրդի պետքարտուղար Ստանիսլավ Զասն է:
