12.11.2024 | 23:27
Գրետա Թունբերգը ժամանել է Հայաստան
Դոնալդ Թրամփի՝ ցեղասպանության մասին դիտարկումներն Իրանի վերջը չեն տա. Ջավադ Զարիֆ
Քաղաքականություն
20.05.2019 | 22:17
Իրանի ԱԳ նախարար Մոհամմադ Ջավադ Զարիֆը, անդրադառնալով ԱՄՆ նախագահ Դոնալդ Թրամփի «ծաղրական» արտահայտություններին, նրան զգուշացրել է չսպառնալ Իրանին: Այս մասին գրում է BBC-ն:
Նշենք, որ երկու երկրների միջև լարվածության աճին զուգահեռ՝ նախօրեին Թրամփն իր թվիթերյան միկրոբլոգում գրել էր. «Եթե Իրանը ցանկանում է կռվել, ապա դա պաշտոնապես նրա վերջը կլինի»:
ԱՄՆ նախագահի հայտարարությանն ի պատասխան՝ Զարիֆն ընդգծել է, որ Թրամփը պատմությունն ուսումնասիրելու կարիք ունի: «Իրանցիները կանգուն են եղել հազարամյակների ընթացքում՝ այն դեպքում, երբ բոլոր ագրեսորները վերացել են… Փորձեք հարցին հարգանքով մոտենալ, դա գործուն տարբերակ է»,- ասել է Զարիֆը:
Վերջին օրերին ԱՄՆ-ն Պարսից ծոց լրացուցիչ ռազմանավեր ու ինքնաթիռներ է տեղակայել:
Այնուամենայնիվ, ԱՄՆ նախագահի թվիթերյան գրառումը փոփոխություն է նշանավորել Իրանի հետ ռազմական հակամարտության հնարավարության նվազեցմանն ուղղված փորձերում:
Նախորդ շաբաթ լրագրողների հարցերին պատասխանելիս՝ Զարիֆն ընդգծել է, որ հույս ունի՝ ԱՄՆ-ն Իրանի դեմ պատերազմ չի հայտարարի:
Հիշեցնենք, որ ԱՄՆ նախագահի զգուշացումն Իրանին հրապարակվել էր այն բանից հետո, երբ Իրաքի մայրաքաղաք Բաղդադում ԱՄՆ դեսպանատան շենքից կես կիլոմետր հեռավորությամբ տեղակայված Կանաչ տարածքում հրթիռ էր այրվել:
Բացի այդ՝ վերջերս Իրանին աջակցող իրաքյան ուժերի լուրջ սպառնալիքների պատճառով ԱՄՆ-ն տարհանել էր ոչ արտակարգ իրավիճակների համար նախատեսված իր անձնակազմը:
Նելլի Մելքոնյան
