Արդյոք նոր հրդեհի վտանգը բացառվա՞ծ է. ծխացող «Նաիրիտը» օդից` հրդեհի բռնկումից չորս օր անց

«Նաիրիտ» քիմիական գործարանի տարածքում ձևավորված է ավտոմատ հովացման համակարգ և անընդհատ իրականացվում է տարաների հովացում, որպեսզի Հանրապետությունում գրանցված բարձր ջերմաստիճանի պայմաններում նոր հրդեհի բռնկման հնարավորությունը բացառվի:

Այս մասին Factor.am-ի հետ զրույցում ասաց ՀՀ ԱԻՆ լրատվական բաժնի ղեկավար Գոհար Բաղդասարյանը: «Տեղում սահմանված է հերթապահություն, մշտապես հերթապահում են ԱԻՆ մեկ-երկու մարտական հաշվարկ, դրանից բացի մեր նախարարը դիմել է միջազգային կազմակերպություններին՝ Եվրամիությանը, Համաշխարհային բանկին և ՄԱԿ-ի համապատասխան գործակալությանը, որպեսզի փորձագիտական աջակցություն տրամադրեն մեզ, բարձրակարգ փորձագետներ ժամանեն Հայաստան, գնահատեն «Նաիրիտում» իրավիճակը, վտանգի դեպքում հնարավոր հետևանքներն ու առկա ռիսկերը»,- մանրամասնեց ԱԻՆ լրատվության բաժնի պատասխանատուն՝ հավելելով, որ այդ ամենը նախարար Դավիթ Տոնոյանի հանձնարարությամբ պետք է իրականացվի շատ սեղմ ժամկետներում:

Գոհար Բաղդասարյանի խոսքով՝ փորձագետների գնահատման հիման վրա կմշակվի ծրագիր՝ խնդրի լուծման համար: Ի դեպ, այսօր՝ «Նաիրիտի» հրդեհից 4 օր անց, քննչական կոմիտեն հայնտեց, որ հարուցվել է քրեական գործ. քննություն է տարվում՝ պարզելու հրդեհի առաջացման պատճառները: Քննչական մարմնի հաղորդմամբ՝ հարուցվել է քրեական գործ՝ ՀՀ քրեական օրենսգրքի 240-րդ հոդվածի 1-ի մասի հատկանիշներով, մշակվել են աշխատանքային վարկածներ և ձեռնարկվում են անհետաձգելի քննչական միջոցառումներ՝ հրդեհի բռնկման պատճառները պարզելու համար։

Հիշեցնենք, որ երեկ էլ ԱԻՆ նախարար Դավիթ Տոնոյանը լրագրողների հետ զրույցում որպես հրդեհի բռնկման պատճառ չէր բացառել մարդկային գործոնը:

Շողիկ Գալստյան