ԱՄՆ-ի և Չինաստանի միջև առևտրային համաձայնությունը վտանգի տակ է հայտնվել

Մայիսի 10-ին Վաշինգտոնը 25%-ով բարձրացրել է  200 մլրդ արժողությամբ չինական ապրանքների ներկրման տուրքերը, որոնք հունվարին 10% էին կազմում։ Այս մասին տեղեկանում ենք Վեդոմոստի-ից։

ԱՄՆ նախագահ Դոնալդ Թրամփը  հրահանգել է պատրաստվել հաջորդ քայլին՝ 25%-անոց տուրքերի ներդրմանը՝ չինական ապրանքների մնացյալ մասի համար, այսինքն՝ ավելի քան 300 մլրդ դոլար։

Մայիսի 9-10-ը Վաշինգտոնում  տեղի ունեցած բանակցությունները արդյունք չեն տվել, չնայած՝ ՉԺՀ պետական խորհրդի փոխնախագահ Լյու Հեն հանգստյան օրերին հայտարարել է․ «Քանի դեռ համաձայնության չենք հասել, ցանկացած փոփոխություն բնական գործընթաց է»։

Լյու Հենը նաև հերքել է Թրամփի այն մեղադրանքները, թե Չինաստանը  նահանջել է և հոնգկոնգյան առցանց պարբերական Phoenix Media-ի միջոցով հայտարարել է․ «Մենք մեր խոսքերից չենք հրաժարվել։ Մենք տարաձայնություններ ենք ունեցել՝ որոշ տեքստեր ձևակերպելու հարցում»։

Կողմերը Պեկինում նոր հանդիպման համաձայնություն են ձեռք բերել՝ չհայտարարելով ժամկետները։ Մինչև վերջերս նրանք հայտարարել էին, որ  զգալի առաջընթաց են արձանագրել և ակնկալվում էր, որ շուտով համաձայնագիր է ստորագրվելու: ԶԼՄ-ները հաղորդել էին, որ մնում է որոշել, թե ինչպես ապահովել ձեռք բերված պայմանավորվածությունների իրականացումը: Սակայն նախորդ շաբաթ՝ բանակցությունների կարևոր փուլից առաջ, որը կարող էր վերջինը լինել, Թրամփն անսպասելիորեն հայտարարել էր տուրքաչափերի բարձրացման մասին: Նախօրեին չինական կողմը բազմաթիվ փոփոխություններ էր առաջարկել, որոնք հակասում էին Վաշինգտոնի հիմնական պահանջներին։

Առևտրային համաձայնագրի նախագծի յոթ գլուխներից յուրաքանչյուրում եղել են պայմաններ, որոնք Պեկինը հրաժարվել է իր օրենքների մեջ ընդգրկել։ Վաշինգտոնը պահանջել է պատասխանատվություն սահմանել մտավոր սեփականության, առևտրային գաղտնիքների, տեխնոլոգիաների պարտադրված փոխանցման, անբարեխիղճ մրցակցության և արժույթի մանիպուլյացիայի համար:

Նելլի Մելքոնյան