16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
ANCA-ն ամերիկյան օրենսդիրներին կոչ է անում մարտահրավեր նետել Ադրբեջանի ագրեսիային
Քաղաքականություն
02.05.2019 | 11:40
ԱՄՆ Հայ դատի հանձնախումբն (ANCA) իր Twitter-ի էջում հրապարակված հաղորդագրությամբ անդրադարձել է 1994 թվականին կնքված զինադադարին՝ նշելով, որ Բաքուն պարբերաբար խախտում է այն: Հանձնախումբն ամերիկյան օրենսդիրներին կոչ է արել մարտահրավեր նետել Ադրբեջանի ագրեսիային:
«Մայիսի 5-ին մենք նշում ենք Արցախի, Հայաստանի և Ադրբեջանի միջև կնքված զինադադարի՝ Բիշքեկի արձանագրության 25-ամյակը։ Մինչդեռ Բաքուն պարբերաբար խախտում է այս համաձայնագիրը, որը ռազմական գործողությունների դադարեցմանն ուղղված միակ միջազգային փաստաթուղթն է։ Եթե մենք ուզում ենք Արցախի Հանրապետության անկախության համար երբևէ երկարատև և ժողովրդավարական խաղաղություն հաստատել, այս համաձայնագիրը պետք է պահպանվի և ամրապնդվի»,- ասվում է հաղորդագրության մեջ։
Հայ դատի հանձնախումբն ԱՄՆ օրենսդիրներին կոչ է անում հրադադարի պայմանագրի 25-ամյակը նշել Ադրբեջանի ագրեսիային մարտահրավեր նետելով՝ շարունակել Արցախին տրամադրվող մարդասիրական օգնությունը, պահանջել խաղաղ բանակցություններին Արցախի մասնակցությունը, աջակցել Արցախում խաղաղության վերաբերյալ Ռոյս-Էնգելս առաջարկություններին, զրոյացնել Ադրբեջանին տրամադրվող ռազմական օգնությունը, ինչպես նաև այս տարի Արցախ այցեր կատարել։
ԱՄՆ Հայ դատի հանձնախումբն այս նպատակով կայք-էջ է ստեղծել՝ «Քայլ՝ դեպի արդարություն» խորագրով (Marchtojustice.org), որտեղ համապատասխան հայտը լրացնելով՝ կարելի է աջակցություն հայտնել ծրագրին։
Նելլի Մելքոնյան
