11.07.2026 | 23:11
Լինդա Նոսկովան՝ «Ուիմբլդոնի» չեմպիոն. ՏԵՍԱՆՅՈՒԹ
Սերգեյ Բագրատյանը Վայոց ձորում քաոսային վիճակ է ստեղծել. Եղեգիս համայնքի ներկայացուցիչ
Քաղաքականություն
30.04.2019 | 19:11
Նպատակս մեր քաղաքացիների ու քաղաքական գործիչների համար Սերգեյ Բագրատյանի դեմքը բացահայտելն է: Ապրիլի 27-ին Եղեգնաձորում տեղի ունեցած միջադեպի հետ կապված այսօր հրավիրված ասուլիսում այս մասին հայտարարեց Լիազորված ֆերմեր, «Գեղաստղ» ծրագրի կազմակերպչական գծով տնօրեն Տիգրան Եղոյանը։
«Այսպիսի արարքները Սերգեյ Բագրատյանի հոգեկերտվածքի մասն են: 2000 թվականին Արտաբույնք գյուղի ընտրությունների ժամանակ նա փորձել է քվեախցիկ ներխուժել և քվեատուփը գողանալ։ Երբ ոստիկանը փորձեց միջամտել, նա հարվածեց ոստիկանին։ Եվ քանի որ ԲՀԿ-ն այն ժամանակ կոալիցիայի մաս էր և իշխանական բուրգին էր կանգնած, գործը կարճվեց»,- նշեց Տիգրան Եղոյանը։
Եղեգիս խոշորացված համայնքի ներկայացուցիչը պնդեց՝ Սերգեյ Բագրատյանը Վայոց ձորում քաոսային վիճակ է ստեղծել. «Այնտեղ ամեն բան ինքն է տնօրինում։ Նա ընդհանրապես իրավասու չէ խոսել ժողովրդի անունից, առավել ևս՝ իրավունք չունի Քաղաքացու օրը խանգարելու»:
Տիգրան Եղոյանի խոսքով՝ Վայոց ձորի մարզպետի տեղակալ Ռազմիկ Տոնոյանը վերջին շրջանում հետևողականորեն կոռուպցիոն բացահայտումներ է արել, ինչն էլ ԱԺ ԲՀԿ խմբակցության պատգամավոր Սերգեյ Բագրատյանին դուր չի եկել։
«Սերգեյ Բագրատյանի համար Ռազմիկ Տոնոյանը ցանկալի անձ չէր։ Եվ սա էր պատճառը, որ վերջինիս մասին ասել էր՝ «Դու ո՞վ ես, որ գաս՝ Վայոց ձորում հարց լուծես»»,- ասաց Եղոյանը։
Նրա խոսքով՝ նախկին իշխանությունների օրոք նմանատիպ հայտարարություն Սերգեյ Բագրատյանը նաև իր մասին է արել։ «Կոչ եմ անում ՀՔԾ-ին և Ոստիկանությանը՝ զբաղվել այս հարցով։ Դիմում եմ Վայոց ձորի բնակչությանը՝ հավաքվե՛ք, ոտքի՛ կանգնեք և պայքարեք օրենքին հակասող քայլերի դեմ»,- ասաց նա:
Եղոյանը հավելեց, որ այսօրվա ասուլիսին Սերգեյ Բագրատյանը ևս հրավիրած է եղել, բայց չի ներկայացել։ Այնուամենայնիվ, նշեց, որ հետագայում պատրաստ է Բագրատյանի հետ անձամբ բանավիճել:
Հիշեցնենք, որ ապրիլի 27-ին Վայոց ձորի փոխմարզպետ Ռազմիկ Տոնոյանը հաղորդում էր ներկայացրել Ոստիկանության Եղեգնաձորի բաժին՝ տեղեկացնելով, որ Քաղաքացու օրվան նվիրված միջոցառման ժամանակ իրեն են մոտեցել ԱԺ ԲՀԿ խմբակցության պատգամավոր Սերգեյ Բագրատյանը և Վայոց Ձորի մարզի Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը: Ըստ Տոնոյանի հաղորդման՝ պատգամավորն ու վարչական շրջանի ղեկավարն իր հասցեին սեռական բնույթի հայհոյանքներ ու անվայել արտահայտություններ են հնչեցրել, վիրավորել, փորձել են հարձակվել իր վրա ու հարվածներ հասցնել:
