28.10.2026 | 11:11
Թրամփն ասել էր «compatriot»՝ գործընկեր, Քեմբրիջի բառարանն աչքի անցկացրեք». Բաղդասարյանը՝ Ղազարյանին․ ՏԵՍԱՆՅՈՒԹ
Երգի պետական թատրոնը նոր տնօրե՞ն կունենա. Արմեն Սարգսյանը պարզաբանում է
26.04.2019 | 19:10
Երգի պետական թատրոնը, հնարավոր է, շուտով նոր տնօրեն ունենա: Ըստ մամուլում շրջանառվող տեղեկության՝ նա Երևանի ավագանու «Իմ քայլը» խմբակցության անդամ Արմեն Սարգսյանն է: Նշենք, որ թատրոնն այժմ ղեկավարում է Արթուր Ասատրյանը:
Factor.am-ի հետ զրույցում Արմեն Սարգսյանը նշեց, որ այս հարցով այսօր քննարկում է ունեցել: Նրա խոսքով՝ իշխանությունից համապատասխան առաջարկ է ստացել:
«Նշանակում դեռ չի եղել, առայժմ խոսակցությունների փուլում ենք։ Թատրոնի ներկայիս տնօրեն Արթուր Ասատրյանի հետ նորմալ հարաբերությունների մեջ ենք: Գեղարվեստական ղեկավար Արթուր Գրիգորյանի հետ էլ երկար տարիներ աշխատել եմ: Կարծում եմ՝ այժմ էլ դեմ չի լինի ինձ հետ աշխատել»,- ասաց Արմեն Սարգսյանը։
Հիշեցնենք, որ ավելի վաղ Արմեն Սարգսյանի անունը շրջանառվում էր որպես Ալ.Սպենդիարյանի անվան օպերայի և բալետի ազգային ակադեմիական թատրոնի տնօրենի թեկնածու: Արմեն Սարգսյանը նշել էր, որ նման առաջարկ չի ստացել, սակայն մեկ այլ թատրոնի տնօրենի պաշտոն զբաղեցնելու առաջարկ է եղել:
«Առաջարկներ շատ եմ ստացել: Բոլորը չեմ կարող թվել»,- Factor.am-ի հետ զրույցում ասաց Արմեն Սարգսյանը:
Երգի պետական թատրոնի այժմյան տնօրեն Արթուր Ասատրյանի հետ կապ հաստատել մեզ չհաջողվեց:
Նելլի Մելքոնյան
