Պուտինը հայտարարել է, որ գոհ է Կիմ Չեն Ընի հետ հանդիպումից

Ռուսաստանի Դաշնության նախագահ Վլադիմիր Պուտինը հայտարարել է, որ գոհ է Կորեայի Ժողովրդա-Դեմոկրատական Հանրապետության առաջնորդ Կիմ Չեն Ընի հետ հանդիպումից։ Այս մասին տեղեկանում ենք ՏԱՍՍ գործակալությունից։

«Բանակցությունների արդյունքներից բոլորս գոհ ենք․ թե՛ ես, թե՛ իմ գործընկերները։ Կիմ Չեն Ընը բավականին բաց մարդ է, որն ազատ քննարկում էր օրակարգում ընդգրկված բոլոր հարցերը»,- նշել է ՌԴ նախագահը։

Քննարկվող հարցերի շարքում Պուտինը նշել է երկու երկրների հարաբերությունները, ՄԱԿ-ի գծով պատժամիջոցների թեման, Հյուսիսային Կորեա-ԱՄՆ հարաբերությունները, ինչպես նաև Կորեական թերակղզու ապամիջուկայնացումը։

«Մենք խոսել ենք շատ մանրամասն, տարբեր կողմերից քննարկել այս բոլոր խնդիրները»,- ընդգծել է Վլադիմիր Պուտինը։

ՌԴ նախագահն ընդգծել է, որ Հյուսիսային Կորեայի վերաբերյալ բանակցությունների ձևաչափի վերականգնումն անհրաժեշտ կլինի, երբ հարցը հասնի Փյոնգյանգի հարցով միջազգային երաշխիքներին, սակայն այս պահին դրա խիստ անհրաժեշտությունը չկա։

«Չգիտեմ՝ դա պե՞տք է արդյոք այս պահին։ Այդուհանդերձ,  համոզված եմ, որ եթե դրան հասնենք, ապա կարիք կլինի կողմերից մեկի համար երաշխիքներ մշակել․ այս դեպքում՝ Հյուսիսային Կորեայի համար, քանի որ առանց միջազգային երաշխիքների չենք կարողանա»,- նշել է Ռուսաստանի ղեկավարը։

Ըստ նրա՝ եթե միայն ԱՄՆ-ի կամ Հարավային Կորեայի կողմից երաշխիքները բավարար չլինեն,  ապա Հյուսիսային Կորեայի համար միջազգային երաշխիքների համակարգի մշակման համար վեցակողմ բանակցությունների ձևաչափի անհրաժեշտություն կառաջանա։

Պուտինը նաև հայտարարել է, որ հնարավոր է Ռուսաստանի, Հյուսիսային և Հարավային Կորեաների միջև համատեղ ենթակառուցվածքային ծրագրերի իրագործումը։ Ըստ նրա՝  այն կնպաստի Կորեական թերակղզում վստահության բարձրացմանը։

ՌԴ նախագահը խոսել է նաև  Հյուսիսային և Հարավային Կորեաներում երկաթուղային ճանապարհների տեղադրման մասին՝ ասելով, որ արդեն իսկ ելք կա դեպի Ռուսաստան, բայց առայժմ հնարավոր չի եղել գոնե առաջին փորձնական խումբն ուղարկել։ Պուտինը հույս է հայտնել, որ մի օր կկարողանան անել դա և որքան շուտ, այնքան լավ։

Նելլի Մելքոնյան