04.06.2026 | 09:15
Հայտնի են ամառային զորակոչի և զորացրման օրերը
ՊՎԾ գործով կալանավորված Սամվել Ադյանն այսօր ազատ կարձակվի
Հասարակություն
25.04.2019 | 12:17
ՊՎԾ աշխատակիցների գործով անազատության մեջ գտնվող Սամվել Ադյանն այսօր ազատ կարձակվի։ Պաշտպանը չցանկացավ նրա գործի հետ կապված որևէ մեկնաբանություն տալ, ասաց՝ ազատ կարձակվի՝ կիմանաք։
Նա նշեց, որ Սամվել Ադյանն արգելել է իրեն լրատվամիջոցներին իր գործի վերաբերյալ մանրամասներ հայտնել։
Հիշեցնենք, որ այսօր լրանում է Ադյանի կալանքի տակ մնալու երկամսյա ժամկետը։ Օրերս Երևանի ընդհանուր իրավասության դատարանը մերժել է Ազգային անվտանգության ծառայության միջնորդությունը՝ ևս երկու ամսով Սամվել Ադյանի կալանքը երկարացնելու վերաբերյալ։
Factor.am-ի տեղեկություններով այս պահին փաստաթղթերի կարգավորման փուլում է գործը։ Ժամեր անց Սամվել Ադյանը ստորագրությամբ ազատ կարձակվի։ Ըստ մամուլի հրապարակումների՝ ՊՎԾ նախկին ղեկավար Դավիթ Սանասարյանի դեմ ցուցմունք տված անձանձից մեկը հենց Սամվել Ադյանն է։
Ի դեպ, հավելենք, որ Գլխավոր դատախազությունն բողոքարկել է Առաջին ատյանի դատարանի որոշումը՝ Ադյանի կալանքը չերկարաձգելու վերաբերյալ։
Հիշեցնենք, որ փետրվարի վերջին ԱԱԾ-ն հայտնեց, որ քրեական գործ է հարուցվել Պետական վերահսկողական ծառայության (ՊՎԾ) գնումների գործընթացների վերահսկողության վերաբերյալ՝ պաշտոնեական դիրքի չարաշահման և այլ հոդվածներով։ Մասնավորապես, հեմոդիալիզի պարագաների մրցույթների գործով մեղադրանք էր առաջադրվել ծառայության երկու աշխատակցի՝ գնումների վերահսկողության վարչության պետ Սամվել Ադյանին և բաժնի գլխավոր մասնագետ Գևորգ Խաչատրյանին, որն ստորագրությամբ ազատ է արձակվել։ ՊՎԾ պաշտոնյաների կողմից պաշտոնեական լիազորությունները չարաշահելու և ծանր հետևանքներ առաջացնելու մասին քրեական գործով անցած շաբաթ մեղադրանք է առաջադրվել ծառայության պետ Դավիթ Սանասարյանին, նրա լիազորությունները կասեցվել են:
Լիլիթ Շաբոյան
