Քաղաքականություն
24.04.2019 | 15:34
Սիրիայում հակամարտության ռազմական փուլն ավարտված է: Միջազգային անվտանգության հարցերով մոսկովյան համաժողովի ժամանակ այս մասին հայտարարել է ՌԴ Զինված ուժերի գլխավոր շտաբի ղեկավար Վալերի Գերասիմովը, գրում է Lenta-ն:
Նա հավելել է, որ Մոսկվայի օգնությամբ Սիրիայի փլուզումը կանխվել է, կառավարական զորքերն իրենց վերահսկողության ներքո են վերադարձրել երկրի տարածքի մեծ մասը: Գերասիմովի խոսքով՝ ազատագրվել է ավելի քան 1.400 բնակավայր, այդ թվում՝ Հալեպը, Պալմիրան, Դեր Զորը, Աբու Քեմալը, Դերյան, տասնյակ հազարավոր զինյալներ ոչնչացվել են, ավելի քան 42 հազարը՝ վայր դրել զենքերը:
«Երկրում լայնածավալ գործողություններ չեն իրականացվում: Սիրիական հակամարտության քաղաքական կարգավորման և հակամարտող կողմերի հաշտեցման մեխանիզմ է գործարկվել»,- ասել է գլխավոր շտաբի ղեկավարը:
Սիրիայում քաղաքացիական պատերազմը սկսվել է 2011 թվականի գարնանը: Հակամարտության հիմնական մասնակիցներն են գործող նախագահ Բաշար Ասադի կողմնակից կառավարական ուժերը, չափավոր ընդդիմությունն ու ահաբեկչական խմբավորումները:
