17.12.2025 | 18:15
Պապոյանն ու Շվեյցարիայի դեսպանը քննարկել են տնտեսության ոլորտում երկկողմ համագործակցության ընդլայնման հնարավորությունները
Այսօր կկայանա Պորոշենկո-Զելենսկի հեռուստաբանավեճը
Քաղաքականություն
19.04.2019 | 12:00
Այսօր՝ ապրիլի 19-ին, Ուկրաինայի մայրաքաղաք Կիևի «Օլիմպիական» մարզադաշտում կկայանա Ուկրաինայի գործող նախագահ Պյոտր Պորոշենկոյի և նախագահի թեկնածու, «Ժողովրդի ծառա» կուսակցության առաջնորդ Վլադիմիր Զելենսկու հեռուստաբանավեճը։ Այն կտևի մեկ ժամ։ Այս մասին հայտնում է rbc.ua-ն։
Պորոշենկոյի կողմից նախորդ բոլոր բանավեճերի հրավերները Զելենսկին անտեսել էր և չէր ներկայացել։ Բացի այդ, նա նշել էր, որ ապրիլի 19-ի հեռուստաբանավեճին ինքն է Պորոշենկոյին հրավիրել, իսկ մյուս բոլոր միջոցառումներին ներկա գտնվել չի պատրաստվում։
Զելենսկին նաև հայտարարել էր, որ Ուկրաինայի գործող նախագահ Պյոտր Պորոշենկոն պետք է իր գործերով զբաղվի և ոչ թե հեռուստատեսությամբ իր հետևից ընկնի՝ այդ ամենը շոուի վերածելով։
«Շոումենը կարող է նախագահ դառնալ, սակայն նախագահը, որը շոումեն է դարձել, տխրեցնող է»,- նշել էր նախագահի թեկնածուն։
Հիշեցնենք, որ ավելի վաղ Պորոշենկոյի թիմակիցները հայտարարել էին, թե Ուկրաինայի Ընտրական օրենսգիրքը պահանջում է, որպեսզի նախագահական ընտրությունների երկրորդ փուլ անցած թեկնածուների բանավեճերը կայանան Հանրային հեռուստատեսության տաղավարում: Այդուհանդերձ, Վլադիմիր Զելենսկին շարունակել էր պնդել, որ դեբատները պետք է կայանան բացառապես մարզադաշտում և քվեարկությունից երկու օր առաջ` ապրիլի 19-ին։
Ապրիլի 16-ի երեկոյան էլ հայտնի էր դարձել, որ Պորոշենկոյի և Զելենսկու նախընտրական շտաբերը մարզադաշտի վարձակալության պայմանների շուրջ համաձայնության են եկել։
Նելլի Մելքոնյան
