09.08.2026 | 13:13
Դաշտավանում ծեծկռտուք է եղել․ մասնակիցները հարվածել են քարերով, մահակներով և կռփազենքով
Ֆինլանդիայի խորհրդարանական ընտրություններում հաղթել են ընդդիմադիր սոցիալ-դեմոկրատները
Քաղաքականություն
15.04.2019 | 12:51
Ֆինլանդիայի խորհրդարանական ընտրություններում, քվեաթերթիկների 100 տոկոսի հաշվարկի արդյունքներով, հաղթել է ընդդիմադիր Սոցիալ-դեմոկրատական կուսակցությունը: Այս մասին գրում է ՏԱՍՍ-ը՝ վկայակոչելով երկրի արդարադատության նախարարության մամուլի ծառայության տվյալները:
Նվազագույն տարբերությամբ սոցիալ-դեմոկրատներին հետևում է նույնպես ընդդիմադիր «Իրական ֆիններ» կուսակցությունը. Սոցիալ-դեմոկրատական կուսակցությունը ստացել է 17.7 տոկոս ձայն, «Իրական ֆինները»՝ 17.5 տոկոս: 16.9 տոկոս քվեով երրորդ տեղում Ազգային կոալիցիոն կուսակցությունն է:
Իշխող «Ֆինլանդական կենտրոնը» 13.9 տոկոս ձայն է ստացել, որն այս ընտրություների արդյունքում խորհրդարանում 18 մանդատ է կորցրել: 11.4 տոկոս ձայնով էլ հինգերորդ տեղում ընդդիմադիր «Կանաչների» միությունն է:
Ընտրությունների արդյունքում սոցիալ-դեմոկրատները խորհրդարանում 40 մանդատ կստանան, ինչպես նաև կառավարություն ձևավորելու հնարավորություն: Սակայն մեծամասնություն ունենալու համար նրանք ստիպված կլինեն կոալիցիա կազմել քաղաքական այլ ուժերի հետ:
Կուսակցության առաջնորդ Անտտի Ռիննեն լրագրողներին ասել է, որ կոալիցիա ձևավորելու համար իր «հարցում կուղարկեմ մյուս ուժերին՝ հասկանալու համար, թե որքանով են համընկնում դիրքորոշումները»: Նա առայժմ դժվարացել է ասել, թե ում հետ են կոալիցիոն կառավարություն կազմելու:
