17.01.2026 | 11:12
Fitch Ratings-ը բարձրացրել է Հայաստանի վարկանիշի հեռանկարը՝ դարձնելով «Դրական», և հաստատել է վարկանիշը «BB-» մակարդակում
Մակրոնը ստորագրել է ապրիլի 24-ը Ֆրանսիայում Հայոց ցեղասպանության հիշատակի ազգային օր ճանաչելու հրամանագիրը
Քաղաքականություն
11.04.2019 | 18:46
Էմանուել Մակրոնը ստորագրել է ապրիլի 24-ը Ֆրանսիայում Հայոց ցեղասպանության հիշատակի ազգային օր հռչակելու հրամանագիրը
Ֆրանսիայի նախագահ Էմանուել Մակրոնը ստորագրել է ապրիլի 24-ը երկրում Հայոց Ցեղասպանության հիշատակի ազգային օր հռչակելու մասին հրամանագիրը: Այս մասին տեղեկանում ենք Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանի ֆեյսբուքյան գրառումից:
Փաստաթղթում նշվում է, որ ամեն տարի ապրիլի 24-ին Ֆրանսիայում կնշվի Հայոց ցեղասպանության հիշատակման ազգային օրը, ամեն տարի այդ օրը Փարիզում միջոցառում կանցկացվի, նմանատիպ միջոցառումներ կարող են կազմակերպել նաև Ֆրանսիայի մյուս քաղաքները:
Սրան հետևել է Թուրքիայի պաշտոնական արձագանքը: ««Ապրիլի 24-ի մասին» նախագահ Մակրոնի հրամանագիրը Մարդու իրավունքների եվրոպական դատարանի և Սահմանադրական խորհրդի որոշումների խախտում է: Մակրոնը փորձում է կատարել նախընտրական քարոզարշավի ժամանակ հայ համայնքին տված խոստումները: Բայց նա նախ պետք է պարզաբանի սեփական պատմության մութ էջերը»,- Twitter-ում գրել է Թուրքիայի ԱԳ նախարար Մևլութ Չավուշօղլուն:
Նշենք, որ Էմանուել Մակրոնն ապրիլի 24-ը Հայոց ցեղասպանության հիշատակի ազգային օր հռչակելու մասին հայտարարել էր Փարիզում հայ համայնքի ամենամյա ընթրիքի ժամանակ՝ փետրվարի 5-ին: Նման խոստմամբ նա հանդես էր եկել դեռևս նախընտրական քարոզարշավի ժամանակ:
Հիշեցնենք, որ Ֆրանսիան Հայոց ցեղասպանությունը ճանաչելու մասին օրենք է ընդունել 2001 թվականին, իսկ 2016 թվականին քրեականացրել է Հայոց ցեղասպանության ժխտումը:
