14.12.2024 | 19:57
Ինչ իրավիճակ է ճանապարհներին 19։35-ի դրությամբ
Իսրայելի գործող վարչապետի «Լիքուդն» առաջատար է խորհրդարանական ընտրություններում
Քաղաքականություն
10.04.2019 | 11:17
Իսրայելի գործող վարչապետ Բենիամին Նեթանյահուի «Լիքուդ» կուսակցությունը և Գլխավոր շտաբի նախկին ղեկավար Բենի Գանցի «Կախոլ Լավան» կուսակցությունների կենտրոնամետ դաշինքը գրեթե հավասարվել են տեղերի թվով, որոնք կստանան Կնեսեթում: ԿԸՀ-ն արդեն հաշվարկել է նախօրեին անցկացված խորհրդարանական ընտրությունների քվեաթերթիկների 94%-ը: Այս մասին գրում է ՏԱՍՍ-ը՝ վկայակոչելով Իսրայելի պետական KAN ռադիոն:
Ըստ աղբյուրի՝ Նեթանյահուի կուսակցությունն ու նրա գլխավոր մրցակից Գանցի դաշինքը 120 տեղանոց խորհրդարանում 35 մանդատ կունենան:
Վարչապետի կոալիցիայում կներգրավվեն ՇԱՍ և «Յախադութ խա-Թորա» կրոնական կուսակցությունները՝ 8-ական մանդատով, նախկին պաշտպանության նախարար Ավիգդոր Լիբերմանի ռուսախոս հրեաների «Մեր տունն Իսրայելն է» կուսակցությունը՝ 4 մանդատով: Այսպիսով, ապագա կառավարությունը Կնեսեթում 65 մանդատ կունենա:
Խորհրդարանական ընտրությունների արդյունքներով Իսրայելի նախագահ Ռեուվեն Ռիվլինը Կնեսեթում մանդատ ստացած ուժերի ներկայացուցիչների հետ խորհրդակցություններից հետո, ամենայն հավանականությամբ, արդեն հաջորդ շաբաթ կհանձնարարի նոր կառավարություն ձևավորել:
Վարչապետի պաշտոնի հավակնորդին 42 օր կտրամադրվի՝ կառավարություն ձևավորելու համար, և եթե նշված ժամկետում նրան դա չհաջողվի, նախագահն այդ իրավունքը կտրամադրի այլ պատգամավորի:
