18.10.2026 | 15:52
Ծանրորդ Էմմա Պողոսյանը` Եվրոպայի երիտասարդների առաջնության ոսկե մեդալակիր
Մեծ Բրիտանիայի կառավարությունը հրաժարվել է սատարել Brexit-ի չեղարկման հանրագիրը
Քաղաքականություն
27.03.2019 | 13:10
Մեծ Բրիտանիայի կառավարությունը հրաժարվել է սատարել Brexit-ի չեղարկման հանրագիրը՝ չնայած ԵՄ կազմում մնալու օգտին ստորագրահավաքին արդեն 5.8 մլն մարդ է միացել. փոխանցում է rbc.ru-ն:
Նախարարների կաբինետում կարծում են, որ 2016 թվականին անցկացված հանրաքվեի արդյունքների վերանայումը կխաթարի բրիտանական հեղափոխության հանդեպ վստահությունը:
«Կառավարությունը չի չեղարկի 50-րդ հոդվածի գործողությունը (Միությունից դուրս գալու իրավունքի մասին ԵՄ համաձայնագրի): Մենք կհարգենք 2016թ. հանրաքվեի արդյունքները և կաշխատենք խորհրդարանի հետ՝ կնքելու համար գործարքը, որը կապահովի Եվրամիությունից մեր ելքը»,- ասված է պաշտոնական պատասխանում:
Վերջին տվյալներով՝ Brexit-ի չեղարկման ստորագրահավաքին միացել է 5.814 մլն մարդ: «Կառավարությունը բազմիցս հայտարարել է, որ ԵՄ-ից դուրս գալը «ժողովրդի կամքն» է: Մենք պետք է վերջ դնենք սրան՝ ցուցադրելով Եվրամիությունում մնալու հասարակական կամքը»,- ասված է հանրագրի հեղինակների պահանջում:
Կառավարությունում նշել են, որ հարգում են ստորագրահավաքին միացած միլիոնավոր մարդկանց կամքը, սակայն դա թույլ չի տալիս հրաժարվել հանրաքվեի արդյունքներից, որին մասնակցել է թագավորության ընտրողների երեք քառորդը, և Brexit-ի օգտին քվեարկել է 17.4 մլն մարդ:
Բրիտանական օրենսդրության համաձայն՝ ապրիլի 1-ին հանրագիրը կքննարկվի խորհրդարանում:
Նշենք, որ Լոնդոնին և Բրյուսելին չի հաջողվել համաձայնության հասնել ԵՄ-ից Մեծ Բրիտանիայի դուրս գալու պայմանների շուրջ: ԵՄ գագաթնաժողովի մասնակիցները համաձայնել են հետաձգել Brexit-ը՝ մարտի 29-ից մինչև մայիսի 22-ը, սակայն պայմանով, որ Մեծ Բրիտանիայի խորհրդարանը հավանություն կտա գործարքին: Իսկ եթե բրիտանացի օրենսդիրները դա չանեն, Brexit-ը տեղի կունենա ապրիլի 12-ին:
