01.05.2026 | 10:00
Մայիսի 2-ից 5-ը Երևանում որոշ փողոցներ փակ կլինեն
Սիրիան պահանջել է Գոլանի բարձունքների հարցով ՄԱԿ-ի ԱԽ նիստ գումարել
Քաղաքականություն
27.03.2019 | 11:19
Սիրիան պահանջել է Գոլանի բարձունքների հարցով ՄԱԿ-ի Անվտանգության խորհրդի արտակարգ նիստ գումարել: Այս մասին գրում է ՌԻԱ Նովոստին՝ վկայակոչելով AFP-ն:
ԱՄՆ նախագահ Դոնալդ Թրամփը, հիշեցնենք, Իսրայելի վարչապետ Բենիամին Նեթանյահուի հետ հանդիպման ընթացքում Գոլանի բարձունքներն Իսրայելինը ճանաչելու մասին հռչակագիր էր ստորագրել:
Նշենք, որ ԱՄՆ նախագահի այս որոշումը քննադատել են արաբական մի շարք երկրներ: ԵՄ դիվանագիտական ծառայության ներկայացուցիչ Մայա Կոսյանչիչն էլ հայտարարել է, որ Եվրամիությունը նախկինի պես Գոլանի բարձունքներն Իսրայելինը չի համարում:
ՌԴ ԱԳՆ պաշտոնական ներկայացուցիչ Մարիա Զախարովան իր հերթին հայտարարել է, որ Անվտանգության խորհուրդը շրջանցելով՝ Գոլանի բարձունքների կարգավիճակի փոփոխությունը ՄԱԿ-ի որոշումների ուղղակի խախտում է:
Հիշեցնենք, որ Գոլանի բարձունքներն Իսրայելը Սիրիայից գրավել է 1967 թվականին, Վեցօրյա պատերազմի ընթացքում: 1981-ին Իսրայելի խորհրդարանը «Գոլանի բարձունքների մասին» օրենք է ընդունել, որը միակողմամի կարգով այդ տարածքն իսրայելական է ճանաչում: ՄԱԿ-ի Անվտանգության խորհուրդը, սակայն, 497 բանաձևով բռնակցումն անօրինական է ճանաչել, իսկ Դամասկոսը շարունակում է Գոլանի բարձունքներն իր տարածքը համարել:
