ԱՄՆ-ն Գոլանի բարձունքներն իսրայելական է ճանաչել. Թրամփի որոշումն արդեն քննադատության է արժանացել

ԱՄՆ նախագահ Դոնալդ Թրամփն Իսրայելի վարչապետ Բենիամին Նեթանյահուի ներկայությամբ փաստաթուղթ է ստորագրել՝ Գոլանի բարձունքներն իսրայելական ճանաչելով: Այս մասին հաղորդում է RT-ն:

«Իսրայելը երբեք ձեզանից ավելի լավ ընկեր չի ունեցել»,- Թրամփին ասել է Նեթանյահուն՝ փաստաթղթի ստորագրման օրը պատմական որակելով:

Սաուդյան Արաբիան դատապարտել է Դոնալդ Թրամփի այս որոշումը: «Թագավորությունը դատապարտում է սիրիական բռնազավթված Գոլանի բարձունքներն իսրայելական ճանաչելու՝ ԱՄՆ վարչակազմի հայտարարությունը»,- ասված է հայտարարությունում: Նշվում է նաև, որ այս որոշումը «ՄԱԿ-ի Կանոնադրության և միջազգային իրավունքների սկզբունքների կոպիտ խախտում է» և «բացասական ազդեցություն կունենա Մերձավոր Արևելքում խաղաղության գործընթացի, տարածաշրջանի անվտանգության և կայունության վրա»:

Հիշեցնենք, որ Գոլանի բարձունքներն իսրայելական ճանաչելու մասին Թրամփը հայտարարել էր մարտի 21-ին, ինչին ի պատասխան՝ ԵՄ հիշեցրել էր, որ դրանք Իսրայելի մաս չի ճանաչում: Ֆրանսիայի ԱԳՆ-ն էլ ընդգծել էր, որ Թրամփի նախաձեռնությունը հակասում է միջազգայինի իրավունքի նորմերին:

Նշենք, որ 1944 թվականից Սիրիային պատկանող Գոլանի բարձունքներն Իսրայելը գրավել է 1967 թվականին, Վեցօրյա պատերազմի ընթացքում: 1981-ին Իսրայելի խորհրդարանը «Գոլանի բարձունքների մասին» օրենք է ընդունել, որը միակողմամի կարգով այդ տարածքն իսրայելական է ճանաչում: ՄԱԿ-ի Անվտանգության խորհուրդը, սակայն, 497 բանաձևով բռնակցումն անօրինական է ճանաչել, իսկ Դամասկոսը շարունակում է Գոլանի բարձունքներն իր տարածքը համարել: