02.03.2025 | 21:36
ՏԿԵ նախարարը հետևել է Սյունիքի մարզում իրականացվող սուբվենցիոն ծրագրերի ընթացքին
Այնպես չէ, որ իրենց բողոքի ակցիաները մեզ ստիպելու են, որ ասենք այ մեր պահած գումարը եկեք հանենք և խնդիրը լուծենք. Արմավիրի մարզպետ
Հասարակություն
18.03.2019 | 16:29
Այսօր Արմավիրի մարզի Լենուղի համայնքի դպրոցի մուտքը փակած և բողոքի ակցիա իրականացնող քաղաքացիները մարզպետ Համբարձում Մաթևոսյանի հետ հանդիպման ժամանակ շարունակել են պնդել, որ չեն պատրաստվում ընդունել նրա առաջարկն ու իրենց վթարային բնակարաններից ժամանակավորապես տեղափոխվել այլ շենք: Այս մասին Factor.am-ի հետ զրույցում ասաց Համբարձում Մաթևոսյանը՝ անդրադառնալով բնակիչների խնդրին ու մարզպետարանի կողմից առաջարկված լուծումներին:
«Մենք առաջարկել ենք ժամանակավորապես տեղափոխվել այլ համայնք կամ այլ շենք, սակայն նրանք մերժեցին: 2015 թվականին 4-րդ կարգի վթարային շենքերից մեկի 7 ընտանիքին հատկացվել է գումար՝ 6 մլն 600 հազար դրամ, և այսօր ակցիա իրականացրած բնակիչները պահանջում են իրենց խնդրին նույն լուծումը տալ՝ 6 մլն դրամ հատկացնել: Սակայն ես այսօր բնակիչներին ասել եմ, որ որևէ մեկը չի կարող իր վրա պատասխանատվություն վերցնել, որ նրանց ևս հատկացվելու է այդ չափի գումար, որովհետև բնակարանների շուկայական արժեքը փոփոխության է ենթարկվել»,-ասաց մարզպետը։
Համբարձում Մաթևոսյանի փոխանցմամբ՝ խնդրի լուծմանը կարող են հասնել միայն Կառավարության որոշմամբ:
«Այնպես չէ, որ իրենց բողոքի ակցիաները մեզ ստիպելու են, որ մենք ասենք՝ այ մեր պահած գումարը հանենք և խնդիրը լուծենք»,- ասաց Մաթևոսյանը՝ շեշտելով, որ խնդրի ուղղությամբ Կառավարության հետ քննարկումները շարունակվում են, և հարցը միայն Լենուղու վթարային շենքերին չի վերաբերում, նման վթարայնության շենքեր կան մարզի մի շարք այլ համայքներում ևս։
Հարցին ի պատասխան՝ այսինքն բնակիչների հետ վերջնական լուծման չե՞ն եկել և չի բացառվում, որ նրանք վաղն առավոտյան բողոքի ակցիան վերսկսե՞ն, Համբարձում Մաթևոսյանը հույս հայտնեց, որ առավոտյան դպրոցի մուտքերը որևէ մեկը չի փակի և ակցիաներ տեղի չեն ունենա:
Աղավնի Սուքիասյան
