25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Պռոշյանում հայտնաբերված փոքրիկին, այնուամենայնիվ, կտեղափոխեն մանկատուն
Հասարակություն
19.08.2017 | 13:27
Օգոստոսի 12-ին Պռոշյան համայնքում ծառի տակ հայտնաբերված երեխան արդեն ծննդական ունի և, ինչպես որոշված էր, նրան կոչել են Մարիամ Պռոշյան: Այս մասին Factor.am-ի հետ զրույցում տեղեկացրեց Պռոշյան համայնքի ղեկավար Արթուր Մուրադյանը:
«Երեկ ենք տեսել փոքրիկին, բժիշկներն ասացին, որ առողջական վիճակը լավ է»,- ասաց Պռոշյան համայնքի ղեկավարը՝ հավելելով, որ երեխայի ծնողների, հարազատների մասին որևէ տեղեկատվություն դեռևս չկա:
Հիշեցնենք՝ օգոստոսի 12-ին Պռոշյան համայնքի Տեղերաշեն փողոցի հողամասի ծառի տակ նորածին երեխա էր հայտնաբերվել, նրան տեղափոխել էին Սուրբ Աստվածամայր ԲԿ-ի վերակենդանացման բաժանմունք:
Ինչ վերաբերում է երեխայի հնարավոր որդեգրմանը, ապա Արթուր Մուրադյանը մեզ հետ զրույցում նշեց, որ այդ մասին խոսելու համար դեռ վաղ է:
Ավելի վաղ, համայնքի ղեկավարը Factor.am-ի հետ զրույցում հայտնել էր՝ երեխային որդեգրել ցանկացողներ կան: «Մի վեց ամիս պետք է ոստիկանության կողմից քննություն ընթանա, երեխային ոչ ոք այդ ընթացքում չի կարողանա որդեգրել: Հնարավոր է՝ մայրը հայտնաբերվի և այլն»,- պարզաբանեց համայնքի ղեկավարը:
Նրա փոխանցմամբ, Մարիամ Պռոշյանը, այնուամենայնիվ, որոշակի ժամանակահատված կանցկացնի մանկատանը:
Շողիկ Գալստյան
