Եթե չմտնեինք ԵԱՏՄ, լոլիկն ու վարունգը Փարիզո՞ւմ էինք վաճառելու. Շարմազանովի պատասխանը «Ելք»-ին

ԱԺ փոխնախագահ, Հայաստանի Հանրապետական կուսակցության (ՀՀԿ)  մամուլի խոսնակ Էդուարդ Շարմազանովը հայտարարում է՝ պաշտոնապես չի լսել և չի կարդացել, որ «Ելք» դաշինքը պատրաստ է ներկայացնել օրենսդրական նախաձեռնություն՝ Հայաստանի՝ Եվրասիական տնտեսական միությունից դուրս գալու վերաբերյալ:

««Ելք» դաշինքից առնվազն մեկ կուսակցություն կա, որը պաշտոնական կարծիք ո´չ նախընտրական, ո´չ հետընտրական փուլում չի հայտնել: Եթե «Հանրապետություն» և «Լուսավոր Հայաստան» կուսակցությունները գոնե իրենց առաջնորդների և ակտիվիստների մակարդակով հայտնել են իրենց տեսակետը, աապ «Քաղաքացիական պայմանագիր» կուսակցությունը ես հստակ տեսակետ չեմ լսել՝ իրենք կո՞ղմ են, թե՞ դեմ ԵԱՏՄ-ին»,- ՀՀԿ գործադիր մարմնի նիստից հետո հայտարարեց Շարմազանովը՝ անդրադառնալով ԵԱՏՄ-ից դուրս գալու «Ելք» դաշինքի որոշ անդամների հայտարարություններին:

Շարմազանովն ասաց, որ Հանրապետական կուսակցությունը, բնականաբար, չի սատարի ընդդիմադիր դաշինքի՝ ԵԱՏՄ-ից դուրս գալու նախաձեռնությանը, որն, ինչպես նշում են այդ դաշինքի անդամները, առաջիկայում պատրաստվում են ներկայացնել:

«Հայաստանի անդամակցությունը ԵԱՏՄ-ին արդյունավետ է, արդարացված է: Առաջարկում ենք մեր գործընկերներին խոսել ոչ թե էմոցիաների և քաղաքական արտաքին ճաշակի առաջնահերթությամբ, այլ փաստերով: Եթե մենք չմտնեինք Եվրասիական տնտեսական միություն, Հայաստանի բանջարեղենը՝ լոլիկն ու վարունգը,  Փարիզո՞ւմ էինք վաճառելու, Հայաստանի կոնյակը պետք է Ֆրանսիայում կամ Մեծ Բրիտանիայում վաճառեի՞նք»,- շարունակեց Շարմազանովը՝ խոստանալով, որ աշնանը առավել մանրամասն կներկայացնեն՝ ինչ օգուտներ է տվել ԵԱՏՄ-ն Հայաստանին:

Իշխող Հանրապետական կուսակցության պաշտոնյան հիշեցրեց՝ ԵԱՏՄ-ին անդամակցությունը արժանացել է խորհրդարանական ընդդիմության ճնշող մեծամասնության աջակցությանը:

Շողիկ Գալստյան