18.10.2026 | 20:17
«Մեր նպատակը նոր խոստումներ տալը չէ, այլ ստանձնած պարտավորությունները կատարելը»․ Մաթևոսյան․ ՏԵՍԱՆՅՈւԹ
Մինսկի խումբը հորդորում է ձեռնպահ մնալ այնպիսի հայտարարություններից, որոնք պահանջում են ձևաչափի միակողմանի փոփոխություն. համանախագահները հայտարարություն են տարածել
Քաղաքականություն
09.03.2019 | 17:20
ԵԱՀԿ Մինսկի խմբի համանախագահներն առաջիկայում սպասվող Փաշինյան-Ալիև հանդպմանն ընդառաջ հայտարարություն են տարածել, որում նշել են, որ ողջունում են Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի պատրաստակամությունը՝ առաջիկայում Մինսկի խմբի համանախագահների հովանու ներքո հանդիպելու կապակցությամբ:
Ըստ համանախագահների՝ իրենք ակտիվ աշխատանքներ են վարում երկու երկրների արտաքին գործերի նախարարների հետ և պատրաստվում են Փաշինյան-Ալիև կարևոր հանդիպմանը, որն իրենց հովանու ներքո ղեկավարների առաջին ուղիղ շփումն է լինելու։
Համանախագահներն ընդգծել են, որ կարևոր է միջավայրն արդյունավետ քննարկումների համար նպաստավոր պահելը և դրական են գնահատել նաև վերջին շրջանում սահմանին զոհերի թվի նվազումը։
«Ողջունում ենք նաև տարածաշրջանում բնակչության խաղաղության նախապատրաստելու նախաձեռնությունները, ինչպես նաև խրախուսում երկու կողմին էլ նման ջանքերն ավելի ինտենսիվ դարձնել»,-ասված է տարածված հայտարարության մեջ:
Միաժամանակ, համանախագահները շեշտել են լարվածությունը թուլացնելու և ռազմատենչ հռետորաբանության նազեցման ծայրահեղ կարևորությունը։
«Կողմերին հորդորում ենք ձեռնպահ մնալ այնպիսի հայտարարություններից և գործողություններից, որոնք առաջարկում են էապես փոխել իրավիճակը, նախապայմաններ են սահմանում ապագա բանակցությունների համար, պահանջում ձևաչափի միակողմանի փոփոխություն՝ առանց մյուս կողմի համաձայնության և պարունակում ռազմական գործողությունները վերսկսելու պատրաստակամություն»,-նշված է հայտարարության մեջ։
Անդրադառնալով վերջին շրջանում Մինսկի խմբի գործընթացի բովանդակության մասին վերջին շրջանում տարածված հակասական հանրային հայտարարություններին՝ համանախագահները վերահաստատել են, որ արդար և տևական կարգավորումը պետք է հիմնվի Հելսինկիի եզրափակիչ ակտի առանցքային սկզբունքների վրա, մասնավորապես՝ ուժ չկիրառելու, տարածքային ամբողջականության, հավասար իրավունքներն ու ժողովուրդների ինքնորոշման։
Այն պետք է ընդգրկի նաև 2009-2012 թվականներին համանախագահող երկրների ղեկավարների կողմից առաջարկված լրացուցիչ տարրերը, որոնք են՝
Լեռնային Ղարաբաղը շրջապատող տարածքների վերադարձը Ադրբեջանի վերահսկողության ներքո
Լեռնային Ղարաբաղի ժամանակավոր կամ միջանկյալ կարգավիճակը՝ անվտանգության և ինքնակառավարման երաշխիքներով
Հայաստանը Լեռնային Ղարաբաղի հետ կապող միջանցք
Լեռնային Ղարաբաղի վերջնական իրավական կարգավիճակի ապագա սահմանումը՝ իրավական ուժ ունեցող պարտադիր կամարտահայտման միջոցով
Բոլոր տեղահանված անձանց և փախստականների վերադարձի իրավունքը իրենց բնակության նախկին վայրեր
Անվտանգության միջազգային երաշխիքները, որոնք ներառում են խաղաղապահ գործողություն:
Համանախագահների կարծիքով՝ այս սկզբունքները պետք է լինեն ցանկացած համակարտության ազնիվ և տևական կարգավորման հիմքում և պետք է ընկալվեն որպես միասնական ամբողջություն։
Ըստ նրանց՝ որևէ սկզբունք մյուսից գերադասելու ցանկացած փորձ հավասարակշռված լուծման հասնելն անհնար կդարձնի։
Համանախագահները հայտնել են, որ ցանկացած ժամանակ պատրաստ են հանդիպել Հայաստանի և Ադրբեջանի Արտաքին գործերի նախարարներին և ղեկավարներին։ Նրանք երկու երկրների ղեկավարներին կոչ են արել առաջին իսկ հնարավորության դեպքում վերսկսել բանակցությունները։
Համանախագահները, համապատասխաբանար, կշարունակեն հակամարտության կողմերի հետ քննարկել գործին առնչվող հարցերը՝ գիտակցելով, որ բանակցային հաջողության հասնելու համար պետք է հաշվի առնվեն նրանց տեսակետներն ու մտահոգությունները։
Նրանք նաև հավելել են, որ շարունակում են ամբողջությամբ պատրաստակամ մնալ՝ օգնելու կողմերին հասնել հակամարտության խաղաղ կարգավորման և աջակցություն են հայտնում անկողմնակալ և քննադատող մոնիթորինգ իրականացնելու հարցում, որն իրականացվում է ԵԱՀԿ գործող նախագահի անձնական ներկայացուցչի և նրա թիմի կողմից։
Նելլի Մելքոնյան
