Շտապօգնությանը փոխարինող «Արագ արձագանքման» ուղղաթիռի թռիչքների մեկնարկը և արժեքն անհայտ է

Հայաստան բերված սանիտարական ուղղաթիռի շահագործման ժամանակացույցն առայժմ հայտնի չէ: Այս մասին Factor.am-ի հարցմանն ի պատասխան փոխանցում են առողջապահության նախարարությունից: «Արտագնա անհետաձգելի բժշկական օգնության «Արագ արձագանքման» ծառայության կողմից ուղղաթիռով պացիենտի տեղափոխման գործընթացի կազմակերպումը գտնվում է քննարկման փուլում և մեկնարկի հստակ ժամկետներ չկան»,- ասված է մեզ փոխանցված պատասխանում:

Սանիտարական ուղղաթիռը ձեռք է բերվել «Էյրբաս» ընկերությունից, գնորդը հանդիսանում է «Արմենիա Հելիքոփթերս» ՍՊԸ-ն: Այս ընկերության տնօրեն Արմեն Մանուկյանը Factor.am-ի հետ զրույցում ևս հրաժարվեց ասել, թե ուղղաթիռը երբ կծառայի նպատակին: Մեր հարցին՝ տեխնիկական խնդիրնե՞ր կան, թե՞ անհետաձգելի հիվանդներ չկան, տնօրենը պատասխանեց. «Ո՛չ տեխնիկական խնդիր կա, ո՛չ պատվերի: Մենք հիմա կազմակերպչական և գրանցման խնդիրների մեջ ենք: Մենք խնդիր չունենք, ամեն ինչ իր բնականոն գործընթացի մեջ է, երբ այդ գործընթացներն ավարտվեն, կտեղեկացնենք»:

Հիշեցնենք, որ այս տարվա փետրվարի 22-ին Հայաստան է բերվել սանիտարական ուղղաթիռ, որը նախատեսված է անհետաձգելի հիվանդներին մարզերից Երևան տեղափոխելու համար: Ուղղաթիռը թռիչքներն իրականացնելու է պետական պատվերի հաշվին: Սակայն այս պարագայում էլ պարզ չէ, թե պետական միջոցներից ընկերությանը մեկ թռիչքի համար որքա՞ն գումար է վճարվելու:

Factor.am-ը, մասնավորապես, հետաքրքրվել էր, թե Շիրակի, Սյունիքի և Տավուշի մարզերից Երևան կատարվող թռիչքներն որքան են արժենալու: «Քանի որ ծառայության մատուցման գործընթացի կազմակերպումը դեռևս քննարկման փուլում է, թռիչքի արժեքը ևս քննարկվում է: Ուղղաթիռով տեղափոխման ենթակա հիվանդությունների և վիճակների դեպքում պացիենտի ուղղաթիռով տեղափոխումը կազմակերպվելու է պետության կողմից երաշխավորված անվճար բժշկական օգնության և սպասարկման շրջանակներում արտագնա անհետաձգելի բժշկական օգնության «արագ արձագանքման» շրջանակներում: Միաժամանակ, տվյալ ծառայությունը կարող է իրականացվել վճարովի հիմունքերով, երբ պացիենտի մոտ բացակայում են ուղղաթիռով տեղափոխման համար սահմանված հիվանդությունները և վիճակները»,- նշել են նախարարությունից տրամադրվող պատասխանում:

«Արմենիա Հելիքոփթերս» ՍՊԸ-ի տնօրեն Արմեն Մանուկյանը Factor.am-ի հետ զրույցում ևս հրաժարվեց այդ թիվն ասել: Առողջապահության նախարարությունից նաև նշում են, որ ուղղաթիռը վարձակալելու հետ կապված նախարարությունը որևէ գործընթաց չի իրականացնում: Պացիենտի ուղղաթիռով տեղափոխումը կազմակերպվելու է շտապ բժշկական օգնության և երրորդ մակարդակի վերակենդանացման ծառայություն մատուցող լիցենզավորված բժշկական կազմակերպությունների կողմից:

Նարեկ Կիրակոսյան