Ղարաբաղյան հակամարտության կարգավորման հարցում հայկական ընդդիմության մոտեցումը իրանցիների մոտ հարցեր է առաջացնում․ Արման Նավասարդյան

Հայաստանում այսօր շատ ուժեղ ռևանշիստական կոմպանիա է ընթանում հեղափոխության և այսօրվա վիճակի դեմ, սա հակահեղափոխական պրոպագանդա է։ Այս մասին այսօր հրավիրված մամուլի ասուլիսի ժամանակ ասաց Հայաստանի դիվանագիտական հիմնադրամի նախագահ, արտակարգ և լիազոր դեսպան Արման Նավասարդյանը:

Նրա խոսքով՝ այդ հակահեղափոխական պրոպագանդայի հեղինակներին հետաքրքրում է հետևյալ հարցը՝ արդյոք ամերիկյան ազդեցությունը կարո՞ղ է փոխել արտաքին քաղաքականության մեջ Իրանի նկատմամբ վերաբերմունքը, ինչին ի պատասխան ասվել է, որ մեր արտաքին քաղաքականությունը բազմավեկտոր է, և այն երրորդ երկրի դեմ չի ընթանալու։

Ըստ Նավասարդյանի՝  ի տարբերություն հակաիշխանական պրոպագանդայի՝ Իրանն Արցախի հարցով ունի մտահոգություններ․ այդ պետությանը մտահոգում է սահմանի երկայնքով պատերազմի վերսկսման հավանականությունը, ինչի մասին անընդհատ գրում են Հայաստանում քննադատները և կարելի է ասել՝ այստեղ նրանց մատը խառն է:

«Ղարաբաղյան հակամարտության կարգավորման հարցում հայկական ընդդիմության մոտեցումը իրանցիների մոտ հարցեր է առաջացնում»,-ընդգծում է դիվանագետը՝ նշելով, որ տարածքների հնարավոր զիջման և ռազմական գործողությունների վերականգնման մասին հայտարարությունների հետ կապված հարցերն Իրանում բնական են. «Բնականաբար, դա կապված է Իրանի անվտանգության խնդրի հետ, և սա չի կարող նրանց չմտահոգել: Ռազմական գործողությունների մասին ցանկացած հայտարարություն Իրանում մտահոգություն է հարուցում՝ անկախ այն հանգամանքից, դա բխում է Բաքվից, թե՞ Երևանից կատարված հայտարարությունից»:

Նավասարդյանը նաև շեշտեց, որ իրանցիներին հետաքրքրում է նաև Ղարաբաղի շուրջ քաղաքական գործընթացը, ինչպես նաև Հայաստանի և Նախիջևանի սահմանին փոփոխությունները: «Նախկինում առաջարկված Մադրիդյան սկզբունքները և Լավրովի ծրագիրը, բնականաբար, մեզ համար ընդունելի լինել չեն կարող: Մեր դիրքորոշումը պետք է բխի այս մոտեցումից»,- ասաց նա:

Խոսելով հայ-իրանական տնտեսական հարաբերությունների մասին, Արման Նավասարդյանը կարծիք հայտնեց, որ դրանք այն բարձրության վրա չեն,  ինչպես որ այսքան ժամանակ ներկայացվել է և դրա պատճառներից մեկը ավարտին չհասած Հյուսիս-հարավ ճանապարհն է։

«Հովիկ Աբրահամյանը մի կտոր սարքեց իր համար, որ Արտաշատից գնա գա 200 կմ/ժ արագությամբ, մնացածը չկա, իսկ ամենածանր մասը մինչև Մեղրի ճանապարհն է: Շատ ծանր ռելիեֆ է, այնտեղ լեռներ են, թունելներ, այդ հատվածի արժողությունը 4 մլրդ դոլար է։ Ճանապարհի այդ հատվածը հնարավոր է կառուցել, եթե Իրանի հետ համատեղ ակտիվ աշխատանքներ տարվեն Չինաստանի հետ, որը «Մետաքսի մեծ ճանապարհ» ծրագիրն իրականություն դարձնելու համար մինչև 2035 թվականը պատրաստվում է 6 տրիլիոն դոլար ներդնել»,- նշեց  Նավասարդյանը:

Աղավնի Սուքիասյան