15.12.2025 | 17:03
Ամեն նոր ծնված երեխային՝ 500 հազար դրամ. ԱԺ հանձնաժողովում քնարկում են առաջարկվող փոփոխությունը. ՏԵՍԱՆՅՈՒԹ
Անտեղի է հայտարարությունը, թե Քննչական կոմիտեն կարող է ազդել փորձագետների վրա. Նաիրա Հարությունյան
Հասարակություն
27.01.2019 | 15:19
Երեկ ԱԺ նախկին փոխնախագահ Արփինե Հովհաննիսյանն իր ֆեյսբուքյան էջում անդրադարձել է Մհեր Եղիազարյանի մահվան դեպքին և նշել, որ պետք է բացառել, որ քննչական մարմինը կամ այլ մարմիններ ճնշում գործադրեն փորձագետների վրա:
«Մասնավորապես՝ որտե՞ղ է կատարվելու փորձաքննությունը, ի՞նչ ժամկետներում, ի՞նչ է արձանագրելու փորձաքննությունը»,-ասված է Արփինե Հովհաննիսյանի գրառման մեջ, որին ի պատասխան ՀՀ քննչական կոմիտեից Factor.am-ին տեղեկացնում են, որ փորձագիտական կենտրոնը գործում է այլ գերատեսչության ենթակայությամբ, ինչը ևս մեկ անգամ գալիս է հերքելու այն մտահոգությունը, թե նախաքննական մարմինը կարող է որևէ կերպ ազդել եզրակացության արդյունքի վրա:
«Եթե տիկին Հովհաննիսյանը նման մտահոգություններ ունի, ապա շտապում եմ փարատել այդ մտահոգությունները և ևս մեկ անգամ նրան հիշեցնել, որ Քննչական կոմիտեն գործում է օրենքով իրեն վերապահված լիազորությունների շրջանակում, հետևաբար խոսք անգամ չի կարող լինել փորձագետների վրա ճնշումներ գործադրելու վերաբերյալ»,-ասաց Քննչական կոմիտեի լրատվության բաժնի պետ Նաիրա Հարությունյանը
Հիշեցնենք, որ Քննչական կոմիտեի տարածած հաղորդագրության համաձայն, երեկ մահացած Մհերի Եղիազարյանը 2015 թվականի գարնանը, աշխատելով «Հայջրմուղկոյուղի» ՓԲԸ-ում որպես մամուլի և հասարակայնության հետ կապերի պատասխանատու, ՓԲԸ–ում հայտարարված մրցույթում հաղթող ճանաչելու վերաբերյալ ՍՊ ընկերություններից մեկի տնօրենին կեղծ խոստում տալով՝ պահանջել և խաբեությամբ մաս-մաս ստացել է առանձնապես խոշոր չափի գումար, ինչի համար ՀՀ քրեական օրենսգրքի 178-րդ հոդվածի 3-րդ մասի 1-ին կետով դատապարտվել է ազատազրկման՝ 4 տարի ժամկետով , սակայն պատիժը պայմանականորեն չի կիրառվել, և սահմանվել է փորձաշրջան՝ հինգ տարի ժամկետով:
2018 թվականի դեկտեմբերին ՀՀ ԱԱԾ քննչական դեպարտամենտում հարուցված քրեական գործի շրջանակներում Մհեր Եղիազարյանին մեղադրանք է առաջադրվել՝ ՀՀ քրեական օրենսգրքի 178-րդ հոդվածի 2-րդ մասի 2-րդ կետով (2դրվագ), 178-րդ հոդվածի 3-րդ մասի 1-ին կետով, 38-34-312-րդ հոդվածի 3-րդ մասի 1-ին կետով (2 դրվագ) և 38-34-312-րդ հոդվածի 2-րդ մասով: Նրա նկատմամբ որպես խափանման միջոց է ընտրվել կալանավորումը: 2018 թվականի դեկտեմբերի 4-ից Եղիազարյանը հացադուլ է հայտարարել:
2018 թվականի դեկտեմբերի 21-ին քրեական գործը դատախազութան միջոցով ուղարկվել է Քննչական կոմիտե՝ նախաքննությունը շարունակելու: 2018 թվականի հունվարի 17-ին Եղիազարյանը դադարեցրել է հացադուլը և պահվելով ՔԿՀ-ում՝ գտնվել է բուժմասի բժիշկների հսկողության տակ: Հացադուլից շուրջ 10 օր հետո՝ այսօր առավոտյան, Մհեր Եղիազարյանի ինքնազգացողությունը կտրուկ վատացել է, և ժամանած շտապ օգնության բժիշկների կողմից արձանագրվել է նրա մահը:
