Զսպաշապիկի փոխարեն՝ արտթերապիա. Սպիտակի խնամքի տունը օազիս՝ տասը բնակչի համար

Հոգեկան առողջության հետ կապված խնդիրներ. յուրաքանչյուրիս մոտ այս արտահայտությունն ասոցացվում է զսպաշապիկների, փակ դռների, ոչ ադեկվատ վարքի ու աչքերի անհաղորդ արտահայտության հետ: Իմանալով մեկի մասին, ով ունի նման որևէ խնդիր՝ մենք միանգամից երկու տարբերակ ենք պատկերացնում. կամ հոգեբուժարան, կամ դժբախտ մի ընտանիք, որտեղ հարազատները փորձում են մեծ ջանքերով, ոմանք անգամ շրջապատից թաքցնելով, տանը պահել ընտանիքի հիվանդ անդամին:

Մինչև վերջերս Հայաստանում իրականությունը հենց այդպիսին էլ կար: Սակայն գտնվեցին հասարակության խոցելի այդ խմբի մասին մտահոգ մարդիկ, ովքեր առաջարկեցին այլընտրանքային տարբերակ նրանց համար, ում թե՛ հոգեբուժարանում, թե՛ տանը գտնվելը անիմաստ ու անօգուտ էր:

Լոռու մարզի Սպիտակ քաղաքում մենք գտանք այդ, այսպես ասած, օազիսը՝ Սպիտակի խնամքի տուն կոչվող: Իրականում այլ կերպ այս կենտրոնը դժվար է անվանել, այն հենց օազիս է՝ հոգեբուժության մերօրյա գորշ ու անապատային իրականությունում, օազիս այն տասը բնակչի համար, ում բախտ է վիճակվել լինելու առաջիններից՝ հոգեբուժարանից այստեղ տեղափոխված: Բաց հասարակության հիմնադրամների նախաձեռնությամբ և հովանավորությամբ՝ Կառավարության որոշմամբ արդեն մեկ տարի գործող այս խնամքի փոքրիկ տունը իր հյուրնկալ պատերից ներս աննկարագրելի մեծ խնդիր է լուծում. հոգեկան առողջության հետ կապված խնդիրներ ունեցող մարդիկ այստեղ բնականոն կյանքի վերադառնալու ամենօրյա հստակ քայլեր են անում համապատասխան մասնագետների ու հոգատար աշխատակիցների օգնությամբ:

Factor.am-ը այցելել է Սպիտակ, ծանոթացել խնամքի տան գործունեությանը, զրուցել աշխատակիցների ու բնակիչների հետ:

Մանրամասները՝ տեսանյութում:

Գոհար Ավագյան