22.04.2026 | 21:21
Բրիտանիայում 2008 թվականից հետո ծնվածների համար ծխելու արգելքի մասին օրինագիծ է ընդունվել
Հայաստանը կարող է արևային էներգիայի արտադրության աշխարհի կենտրոնը դառնալ. Վահան Համազասպյան ՏԵՍԱՆՅՈՒԹ
Տնտեսություն
18.01.2019 | 16:53
Հայաստանը գազ, նավթ չունի, բայց արևային էներգիայի մեծ պաշարներ ունի: Հունվարի 18-ին հրավիրված ասուլիսում ասաց «Հայաստանի հելիոֆիկացիայի ծրագրի» հեղինակ, տեխնիկական գիտությունների դոկտոր Վահան Համազասպյանը և մի քանի տվյալ ներկայացրեց: Նրա տվյալներով՝ աշխարհի 30 երկրներում կա 193 ատոմակայան, 454 էներգաբլոկ, որոնք արտադրում են 400 Գվտ/ժ էներգիա:
«Հաշվարկը ցույց է տալիս, որ Հայաստանի տարածքով անցնում է այնքան արև, որը բավական կլինի աշխարհի էներգետիկ պահանջարկը բավարարելու 21 անգամ: Մեր արևի պաշարներն ավելի շատ են, քան ամբողջ աշխարհի էներգետիկ պաշարները»,- նշեց Համազասպյանը:
Այս իրավիճակում Հայաստանը չի կարողանում այս բնագավառում արդյունքի հասնել, և Վահան Համազասպյանը չի կարողանում հասկանալ նաև իշխանությունների կեցվածքը:
«Անցյալ տարի, դեռևս հեղափոխությունից առաջ, Սպիտակում քանդեցին մի հսկայական գործարան, որը շատ պետք էր մեր արևային տեխնիկան զարգացնելու համար, մենք կդառնայինք աշխարհի կենտրոնը արևային տեխնիկայի արտադրության բնագավառում: Ամեն ինչ քանդեցին, ոչ մեկը տեր չեղավ: Դիմեցի ԱԱԾ տնօրեն Արթուր Վանեցյանին, ոստիկանապետին, պատասխաններն ուղղակի զարմացնում են մեզ»,- նշեց Համազասպյանը, սակայն չմանրամասնեց, թե ինչ պատասխան է ստացել:
Ըստ նրա՝ Նիկոլ Փաշինյանը խնդիր է դնում հեղափոխություն իրականացնել նաև տնտեսության մեջ. «Համոզված եմ՝ շատ ճիշտ քայլ կլինի: Պետք է այսօր ամեն ինչ անել, որ ծրագիրն իրականացվի Հայաստանում: Ես կոչ կանեի, որ պառլամենտի հանձնաժողովների ձևավորումից հետո այս խնդիրը դրվի քննարկման՝ որպես առաջնահերթ: Տեխնիկական առումով մենք պատրաստված ենք, ուղղակի պետք է մասսայականացնել արտադրությունը: Դրա համար առնվազն պետք է հասկանալ, թե ինչ գործարաններ դեռևս ունենք և արագ գործի անցնենք»:
Համազասպյանն ասում է՝ այս ծրագրի ամենակարևոր գաղափարն այն է, որ կարողանանք ստեղծել հելիոտեխնիկական արդյունաբերություն և աշխարհին մեզ համար շուկա դարձնենք: Նա վստահեցրեց, որ զանգվածային արտադրության դեպքում հնարավոր կլինի արևային էներգիայի միջոցով ծածկել էներգիայի ծախսն ու մաքուր բնություն ստեղծել:
Մանրամասները՝ տեսանյութում:
