Սերժ Սարգսյանի հրաժարականը պահանջելու իմաստ չենք տեսնում. Գևորգ Գորգիսյան

Ազգային ժողովի «Ելք» խմբակցության պատգամավոր Գևորգ Գորգիսյանին «Զիբիլիքս»-ի աղմկոտ գործը կարճելու՝ Հատուկ քննչական ծառայության որոշումն այնքան էլ չի զարմացրել: Այս մասին Factor.am-ի հետ զրույցում հայտարարեց ընդդիմադիր քաղաքական ուժի ներկայացուցիչը:

2017 թվականի մայիսի 14-ին Երևանի ավագանու ընտրություններում, հիշեցնենք, ընդդիմադիր «Ելք» դաշինքի անդամների ձեռքում էր հայտնվել, նրանց պնդմամբ, Տարոն Մարգարյանի՝ Կոմիտաս 56 հասցեում գտնվող նախընտրական շտաբից հանված, ապա աղբամանը նետված փաստաթղթերով մի պարկ: Մոտ 30 էջից բաղկացած այդ նյութերում առկա էին ընտրողների ցուցակներ, մանրամասն նկարագրված էր՝ որտեղ և ինչպես է հարկավոր ընտրողներին գումարը փոխանցել:

Բացի այդ, կար ևս մեկ ցուցակ, որը ընդդիմադիրների պնդմամբ, վկայում էր, որ ընտրական գործընթացում ներգրավված են եղել նաև ՊՊԾ գնդի ոստիկանները:

«Հատուկ քննչական ծառայության ներկայացրած հիմնավորումները մտածելու տեղիք են տալիս: Ցուցակների հետ մենք ներկայացրել էինք նաև ֆաքս, որտեղ հստակ նշված էր, որ ՊՊԾ գնդի անդամները ինչ-որ մարդկանց թվաքանակով ներկայացնում էին, թե ինչ պետք է արվեր, ենթադրաբար այդ մարդկանց թվաքանակն այն մարդկանց թիվն էր, ովքեր պետք  է այդքան ձայն բերեին, որովհետև այլ պարագայում դա ուղղակի նախընտրական շտաբում չպետք է լիներ»,- մեզ հետ զրույցում  անդրադառնալով ՀՔԾ որոշմանը՝ ասաց ընդդիմադիր պատգամավորը:

Հիշեցնենք՝ Հատուկ քննչական ծառայությունը թեև չի հերքել, որ ցուցակներն անմիջական առնչություն են ունեցել ՊՊԾ աշխատակիցների հետ, այդուհանդերձ պարզել է՝ այդ գրառմամբ ցուցակը վերաբերել է «Հավաք» ազդանշանի ժամանակ ՊՊԾ գնդի կադրային շարժին:  Գորգիսյանը, մինչդեռ, նշում է՝ անգամ եթե դա  այդպես է, ապա ցուցակները որևէ կերպ չպետք է հայտնվեին Հանրապետականի շտաբում:

Գևորգ Գորգիսյանը մեզ հետ զրույցում անդրադարձավ նաև «Ելք»  դաշինքի կողմից  Սերժ Սարգսյանի հրաժարականի պահանջին՝ նշելով, որ նրա հրաժարականը պահանջելու իմաստ չկա և անձի փոփոխությամբ երկրում փոփոխություն չի կարող լինել:

Մանրամասները՝ տեսանյութում:

Շողիկ Գալստյան