08.06.2026 | 12:48
ԲՀԿ-ն չի հաղթահարում անցողիկ շեմը՝ ըստ ԿԸՀ-ի նախնական արդյունքների
Նիկոլ Փաշինյանը՝ «Վեդոմոստի»-ի «Տարվա մարդ» վարկանիշում
Քաղաքականություն
28.12.2018 | 11:42
Ռուսական «Վեդոմոստի» պարբերականը «Տարվա մարդ 2018» վարկանիշն է կազմել, որում ներառվել է նաև ՀՀ վարչապետի պաշտոնակատար Նիկոլ Փաշինյանը: Վարկանիշում, ընդհանուր առմամբ, վեց բաժին կա՝ «Տարվա քաղաքական գործիչ», «Տարվա գործարար», «Տարվա պրոֆեսիոնալ», «Տարվա անհատ անձ», «Տարվա մշակութային հերոս», «Տարվա զոհ»:
Նիկոլ Փաշինյանը հաղթող է ճանաչվել «Տարվա քաղաքական գործիչ» բաժնի «Ընթերցողի ընտրություն» ենթաբաժնում:
Ըստ պարբերականի՝ անցնող տարին նշանավորվեց հետխորհրդային տարածքում հերթական «գունավոր հեղափոխությամբ», այս անգամ՝ «Ռուսաստանի ամենամերձավոր և հավատարիմ դաշնակից Հայաստանում»: Պարբերականը ներկայացնում է «թավշյա հեղափոխության» իրադարձությունները՝ դրանք ամփոփելով դեկտեմբերի 9-ի արտահերթ խորհրդարանական ընտրությունների արդյունքներով, որոնց համաձայն՝ Նիկոլ Փաշինյանի գլխավորած «Իմ քայլը» դաշինքը ստացավ ընտրողների ավելի քան 70%-ի աջակցությունը, իսկ նախկին իշխող Հանրապետական կուսակցությունը չկարողացավ հաղթահարել անցողիկ շեմն ու զրկվեց խորհրդարանում մանդատ ունենալու հնարավորությունից:
Հավելենք, որ «Վեդոմոստի»-ի «Տարվա քաղաքական գործիչ» բաժնում ներառվել են նաև ՌԴ նախագահ Վլադիմիր Պուտինը, Գերմանիայի կանցլեր Անգելա Մերկելը, ԱՄՆ նախագահ Դոնալդ Թրամփը, Հյուսիսային Կորեայի առաջնորդ Կիմ Չեն Ընը, Խակասիայի Հանրապետության ղեկավար Վալենտին Կոնովալովը:
