Քաղաքականություն
26.12.2018 | 16:25Ազգային ժողովի արտահերթ ընտրություններն ամբողջացրին քաղաքական այն ցիկլը, որը սկսվել էր թավշյա հեղափոխությամբ, բայց տարօրինակն այն էր, որ թավշյա հեղափոխությանն աջակցած ամենաակտիվ ուժերը խորհրդարան չանցան, բացի Նիկոլ Փաշինյանի շուրջ համախմբվածները, որովհետև Նիկոլ Փաշինյանը, որպես հեղափոխության առաջնորդ մեկ բան է, իսկ մեկ այլ բան է հեղափոխության իդեալը, որը կրում էին շատ քաղաքական ուժեր։
Այս մասին այսօր հրավիրված մամուլի ասուլիսի ժամանակ ասաց քաղաքագետ, Քրիստոնեա-ժողովրդական Վերածնունդ կուսակցության նախագահ Լևոն Շիրինյանը։
«Ստացվեց մի բան, որ Ընտրական օրենսգիրքը, որը ժառանգությունն էր Սերժ Սարգսյանի, աշխատեց ժողովրդական ներկայացուցչության դեմ, որովհետև այնպիսի հասարակությունում, ինչպիսին մենք ենք, որտեղ արյունակցական կապերն են ուժեղ, դարձավ բախումների պատճառ։ Մեր տիպի հասարակություններում ռեյտինգային ընտրակարգը դարձավ պառակտումների պատճառ»,- ասաց քաղաքագետը։
Լևոն Շիրինյանը նկատեց, որ նման ընտրությունների արդյունքում է, որ ձևավորվեց այնպիսի Ազգային ժողով, որը չունի ընդդիմություն։
«Լիբերալ արժեքներ դավանողները փաստորեն կազմում են խորհրդարանի 80-90 տոկոսը, ստացվում է՝ 90-ական թվականներին ունեինք կոմունիստական ծայրահեղություն, հիմա էլ ունենք լիբերալիստական ծայրահեղություն։ Երկուսն էլ վտանգավոր են։ Այս խորհրդարանը չունի ընդդիմություն, իսկ թե ինչպիսի ընդդիմություն կլինի ԲՀԿ-ն, կապրենք՝ կտեսնենք»,- ասաց Լևոն Շիրինյանը՝ շեշտելով, որ հասարակությունը տուրք տալով մեկ քաղաքական ուղղությամբ գնալու ցանկությանը՝ ստեղծեց խնդիրներ իր համար։
Լևոն Շիրինյանն ասաց, որ որպես արտախորհրդարանական ուժ փողոցային պայքարի դուրս գալու մտադրություն չունեն, կլինեն այլընտրանք ինչպես ասել են։
Մանրամասները՝ տեսանյութում։
