14.07.2026 | 17:59
Telegram-ի հղումների t.me դոմեյնը դադարել է գործել ամբողջ աշխարհում
Պուտինն ու Լուկաշենկոն չեն կարողացել համաձայնության հասնել գազի գնի շուրջ. Կրեմլի խոսնակ
Քաղաքականություն
26.12.2018 | 15:11
Նավթագազային ոլորտում Ռուսաստանի հարկային մանևրումների շուրջ Մոսկվայի և Մինսկի տարաձայնությունները չի հաջողվել հարթել: Lenta-ի փոխանցմամբ՝ այս մասին հայտարարել է Կրեմլի խոսնակ Դմիտրի Պեսկովը:
Նրա խոսքով՝ ռուսական կողմը համաձայն չէ բելառուս գործընկերների որոշ տեսակետների հետ, որոնք փոխհատուցում են ակնկալում: Պեսկովը նշել է, որ դեռևս պետք է երկու կողմերի համար ընդունելի լուծումներ գտնել:
««Հակասությունների կծիկից» խուսափելու համար նախագահները պայմանավորվել են նոր հանդիպման մասին: Հստակ ժամկետ դեռևս չի որոշվել»,- հավելել է նա:
Նշենք, որ դեկտեմբերի 25-ին Ռուսաստանի և Բելառուսի նախագահներ Վլադիմիր Պուտինն ու Ալեքսանդր Լուկշենկոն երկու երկրների կառավարությունների անդամների մասնակցությամբ բանակցություններ են վարել, որոնք շուրջ չորս ժամ են տևել: Արդյունքում որոշվել է աշխատանքային խումբ ստեղծել՝ վիճելի հարցերի շուրջ լուծումներ գտնելու համար: Նշվում է, որ 2020 թվականից Մոսկվան և Մինսկը պետք է գազի գնի ձևավորման հարցով առաջարկներ մշակեն:
Հիշեցնենք, որ մինչ Մոսկվա մեկնելը Ալեքսանդր Լուկաշենկոն հայտարարել էր, որ Ռուսաստանն այլևս եղբայրական պետություն չէ Բելառուսի համար:
Հավելենք, որ վաղը՝ դեկտեմբերի 27-ին Մոսկվա կմեկնի նաև Հայաստանի վարչապետի պաշտոնակատար Նիկոլ Փաշինյանը: Ռուսաստանցի գործընկերոջ հետ հանդիպմանը կքննարկվի նաև Հայաստանին մատակարարվող բնական գազի սակագնի հարցը: Նիկոլ Փաշինյանը բանակցությունների հաջող ելքի հույս է հայտնել:
